Лінкі ўнівэрсальнага доступу

Ва Ўкраіне пачалася рэгістрацыя кандыдатаў на пасаду прэзыдэнта


Ганна Соусь, Прага 31 кастрычніка ва Ўкраіне адбудуцца прэзыдэнцкія выбары. Незалежныя назіральнікі мяркуюць, што гэтыя выбары вызначаць, ці абярэ Ўкраіна дэмакратычны шлях, альбо ў гэтай краіне ўкараніцца ўсё больш аўтарытарны стыль кіраваньня, як ў Расеі й Беларусі.

Ва Ўкраіне пачалася перадвыбарчая кампанія. Ужо сем кандыдатаў заявілі пра свой намер балятавацца на пасаду кіраўніка Ўкраіны. Сярод іх найбольшыя шанцы маюць дзейны прэм’ер Віктар Януковіч і лідэр правацэнтрысцкай апазыцыі лідэр блёку “Наша Ўкраіна” Віктар Юшчанка. Сярод другіх ўжо зарэгістраваных кандыдатаў – лідэр камуністаў Пётр Сіманенка і старшыня Сацыялістычнай партыі Аляксандар Мароз, лідэрка прагрэсіўнай сацпартыі Натальля Вітрэнка, старшыня Усеўкраінскага палітаб’яднаньня “Адзіная сям’я” Аляксандар Ржаўскі і старшыня Славянскай партыі Аляксандар Базілюк.

Зьбіраюцца зарэгістравацца кандыдатамі на прэзыдэнта таксама кіраўнік Ліберальна-дэмакратычнай партыі Ігар Душын і прэзыдэнт Украінскага саюзу прамыслоўцаў і прадпрымальнікаў Анатолі Кінах.

Дзейны прэзыдэнт Леанід Кучма неаднаразова заяўляў, што ня будзе балятавацца на трэці тэрмін. Аднак згодна з рашэньнем Вярхоўнага Суду Украіны фармальна ён мае такое права. Некаторыя палітычныя аглядальнікі мяркуюць, што ён яшчэ можа высунуць сваю кандыдатуру на трэці тэрмін.

Іван Лазавы дырэктар незалежнага інстытуту Дзяржаўнасьці і дэмакратыі адзначае адсутнасьць поўнага яднаньня пра-ўрадавых сілаў Украіны.

(Лазавы: ) “Гэта значыць, на маю думку, магчымасьць такіх вось сур''ёзных паваротаў, у тым ліку й таму што паўнамоцтвы Леаніда Кучмы завяршаюцца”.

Аднак, паводле Івана Лазавога, такая верагоднасьць невялікая, і прэм’ер Януковіч, як кандыдат, працягвае палітыку дзейнага ўраду.

Аналітык лічыць, што калі на выбарах пераможа праўладны кандыдат, то гэта яшчэ больш наблізіць Украіну да Расеі. Лідэр апазыцыі Віктар Юшчанка падчас мітынгу ў Кіеве ў нядзелю паабяцаў 70 тысячам сваіх прыхільнікаў змагацца з карупцыяй ў вышэйшых эшалёнах улады, павялічыць заробкі й пэнсіі й стварыць мільёны працоўных месцаў.

Віктар Януковіч, гэтак як і Юшчанка, выступае за больш блізкія стасункі з Захадам, аднак не ў абыход Расеі. Большасьць апытаньняў грамадзкай думкі сьведчаць пра тое, што Віктар Юшчанка мае 25-27 адсоткаў галасоў выбаршчыкаў, а Віктар Януковіч – 17-18 адсоткаў.

Аналітыкі папярэджваюць, што пад час выбарчай кампаніі верагодна будзе задзейнічаны адміністрацыйны рэсурс, а таксама будуць выкарыстоўвацца брудныя тэхналёгіі.
XS
SM
MD
LG