ДУБЛІН. Прэзыдэнт ЗША Джордж Буш заявіў, што Злучаныя Штаты хацелі бы, каб Турэччына стала сябрам Эўразьвязу. Паводле Буша, Турэччына ўдала спалучае эўрапейскае аблічча з ісламскімі традыцыямі. Як толькі Турэччына выканае ўсе ўмовы, неабходныя для сяброўства ў Эўразьвязе, трэба пачынаць перамовы аб яе далучэньні да зьвязу. Гэтак заявіў Джордж Буш на саміце ЗША-Эўразьвяз у Дубліне.
У Турэччыне прымаюцца надзвычайныя меры бясьпекі напярэдадні саміту НАТО, які распачнецца ў панядзелак. Узброеныя паліцыянты на катэрах патрулююць Басфорскую пратоку. У Анкары, куды сёньня з Дубліну прыязджае Джордж Буш, раён вакол гатэлю, дзе спыніцца прэзыдэнт, цалкам ачэплены. Напярэдадні саміту амэрыканскі лідэр сустрэнецца з лідэрамі Турэччыны. Візыту Буша папярэднічаў шэраг пратэстаў. У Анкары і Стамбуле ў выніку выбуху бомбаў былі паранены 3 чалавекі, і забіты чатыры чалавекі. Яшчэ некалькі бомбаў ўдалося загадзя нэйтралізаваць. Затрыманы дзесяткі чалавек.