Лінкі ўнівэрсальнага доступу

На кватэры генэрала Фралова будзе засядаць альтэрнатыўная выбарчая камісія


Алесь Дашчынскі, Менск Сёньня дэпутаты прынялі рашэньне спыніць галадоўку. За час галадоўкі Валеры Фралоў скінуў 11 кіляграмаў, Сяргей Скрабец — 14, а Ўладзімер Парфяновіч — 9 з паловай. Марына Багдановіч і Генадзь Ананьеў пасьпяхова пакінулі кватэру і не былі затрыманыя міліцыянтамі.

Міліцыянты не затрымалі галадоўнікаў Марыну Багдановіч і Генадзя Ананьева, якіх раней зьбіраліся прымусова даставіць у Ленінскі раённы суд Менску за спробу разгарнуць гарадок з намётаў у двары дому, дзе знаходзіцца кватэра Валерыя Фралова.

Пасьля таго, як галадоўнікі аб’явілі пра заканчэньне галадоўкі, Марына Багдановіч і Генадзь Ананьеў патэлефанавалі з балькону кватэры генэрала Фралова намесьніку начальніка міліцыі Ленінскага раёну, каб паведаміць, што яны выходзяць на вуліцу.

(Багдановіч: ) “Сяргей Мар’янавіч, паколькі ў нас скончылася галадоўка і Генадзю патрэбна выяжджаць дахаты, ён у нас чалавек законапаслухмяны, гэтак жа, як і я, папярэджвае, што праз гадзіну ён ужо зьявіцца на вуліцы. Калі ў вас заданьне прымусова даставіць нас у суд, то ён гатовы. А мне патрэбна дачку ўладкаваць, я прашу хаця бы да панядзелка разабрацца з дачкой, ёй 9 гадоў, патрэбна ў іншае месца яе ўладкаваць”.

Па тэлефоне міліцэйскі начальнік пацікавіўся станам здароўя Марыны Багдановіч.

(Багдановіч: ) “Мяне пазаўчора хуткая забрала, сэрца, патрэбна адлежацца, лекаў папіць. Але калі трэба, я ж разумею, я супраць закону ніколі не іду. Тым болей, я лічу, што я яго не парушала, гэтак жа, як і Генадзь. Спадзяюся, што суд гэтак і вырашыць”.

У двары да Марыны Багдановіч і Генадзя Ананьева міліцыянты не падышлі. Усе галадоўнікі паехалі дахаты, дзе пачнецца ня менш складаны працэс выхаду з галадоўкі. Перад ад’ездам з кватэры Валерыя Фралова яны сымбалічна выпілі сок, які загадзя падрыхтаваў з рознай садавіны і гародніны сябра АГП, доктар Уладзімер Чырвоненка.

(Чырвоненка: ) “Пачатак зроблены. Усё патрэбна рабіць паступова, трэба менш працаваць. Стомленасьць вельмі адчуваецца”.

За час галадоўкі Валеры Фралоў скінуў 11 кіляграмаў, Сяргей Скрабец — 14, а Ўладзімер Парфяновіч — 9 з паловай. Прыблізна такія ж лічбы ў шасьцёх сяброў АГП і БНФ, якія ўдзельнічалі ў палітычнай галадоўцы.

Гаспадар кватэры генэрал Фралоў сказаў, што неўзабаве здыме плякат з патрабаваньнямі з балькону, бо людзі, якія жывуць у дамах побач, мелі час зь імі пазнаёміцца. Паводле генэрала, ягоная кватэра застанецца асяродкам апазыцыі й тут будзе засядаць альтэрнатыўная Цэнтральная выбарчая камісія. А некаторых сябраў камісіі ён ужо ведае.

Працэс выхаду з галадоўкі Фралоў вывучаў па кнізе цягам пяці дзён і моцна чакаў, калі можна будзе выпіць соку ці чаго зьесьці. Фралоў не зьбіраецца адпачываць, хаця гэта яму рэкамэндуюць дактары, і выхад з галадоўкі будзе сумяшчаць з працай.

На бальконе ў Фралова засталіся яшчэ немалыя запасы пітной вады ў плястыкавых бутэльках, а на сьцяне, над канапай, плякат з надпісам “21 ліпеня”, на якім пакінулі аўтографы ўсе галадоўнікі.
XS
SM
MD
LG