Лінкі ўнівэрсальнага доступу

Юрыя Бандажэўскага перавялі на вольнае пасяленьне, а ў Францыі за яго сабралі 14 тысяч подпісаў


Валер Каліноўскі, Менск У Францыі сабрана болей за 14 тысяч подпісаў за поўнае вызваленьне прафэсара, былога рэктара Гомельскага мэдінстытуту, які абвешчаны “Міжнароднай амністыяй” вязьнем сумленьня.

Юрыя Бандажэўскага на гэтым тыдні перавезьлі зь менскай турмы на так званае вольнае пасяленьне ў адну з былых вайсковых казармаў, што на Гарадзеншчыне. Пра гэта паведаміла жонка прафэсара Галіна. Везьлі яго ў цягніку “па этапу” ажно тры дні, цягам падарожжа тры разы правяралі рэчы. Але калі спадар Бандажэўскі выйшаў з вагона, то ледзьве не заплакаў: яго сустракаў на станцыі афіцэр, а не канвой з аўтаматамі й сабакамі, як звычайна. Рэжым утрыманьня Юрыя Бандажэўскага аблегчаны ў адпаведнасьці з заканадаўствам, бо ён адбыў у турме палову свайго васьмігадовага тэрміну зьняволеньня. Камітэт выкананьня пакараньняў мог перавесьці яго на пасяленьне яшчэ ў пачатку году, але дацягнуў да лета.

“Гэтая сыстэма створаная для таго, каб зламаць чалавека”, — зазначыла ў сувязі з гэтым Галіна Бандажэўская. У аўторак яна ўжо мела спатканьне з мужам на новым месцы, прывезла яму харчы, посуд, бялізну. У пакоях спэцустановы разьмешчана па 12 асобаў, якія адбываюць пакараньне, умовы жудасныя, кажа спадарыня Бандажэўская, халодная вада паступае зь перабоямі, але ўсё ж там лепей, чым у адзіночнай турэмнай камэры. Прафэсар цяпер можа больш-менш вольна хадзіць па тэрыторыі і дыхаць чыстым лясным паветрам. Галіна Бандажэўская апісала стан здароўя свайго мужа як здавальняючы, ён актыўна займаецца фізкультурай. Хаця сёлета ў студзені ён ледзьве не загінуў, калі турэмныя лекары няправільна паставілі яму дыягназ пры запаленьні апэндыцыту, якое перарасло ў пэрытаніт, і ў кішэчніку разьліўся гной, — паведаміла жонка былога рэктара Гомельскага мэдінстытуту.

Спадарыня Бандажэўская шкадуе, што і цяпер шанцаў на вяртаньне яе мужа да навуковай дзейнасьці няма. Але яна разьлічвае ўсё ж на датэрміновае вызваленьне Бадажэўскага, калі пройдзе дзьве траціны тэрміну, гэта чакаецца ўжо празь сем месяцаў.

Пасьля апошняй сустрэчы з мужам Галіна Бандажэўская адбыла ў Францыю зь вялікай групай чарнобыльскіх дзяцей, якія накіраваліся на аздараўленьне. Тым часам у Францыі праходзіць грамадзкая акцыя ў падтрымку прафэсара Бандажэўскага. Болей за 14 тысяч чалавек падпісалася пад маніфэстам з патрабаваньнем да беларускіх уладаў вызваліць прафэсара, як мага хутчэй даць яму магчымасьць вярнуцца ў навуковую супольнасьць і працягваць дасьледаваньні ў галіне ўплыву радыяцыі на здароўе чалавека.

Францускія праваабаронцы зазначаюць, што спадар Бандажэўскі мае права на агульную амністыю, якая нядаўна была абвешчаная ў Беларусі. Цяпер яны распачалі новую акцыю — рассылкі электронных лістоў пад назвай “Прафэсар Бандажэўскі ў турме” з мэтай дадатковага ціску на беларускія ўлады. Пакуль спадар Бандажэўскі быў у турме, яго абралі ганаровым грамадзянінам францускага гораду Клермон-Фэрана, пабраціму Гомеля.

Прафэсар Юры Бандажэўскі і ягоны калега прарэктар Гомельскага мэдінстытута Ўладзімер Раўкоў былі асуджаны ў 2001 годзе за хабар, які нібыта атрымалі ад бацькоў абітурыентаў Гомельскага мэдінстытуту. Падчас судовага працэсу праваабаронцы зафіксавалі восем парушэньняў дзейнага беларускага заканадаўства. Міжнародная і беларуская грамадзкасьць лічыць Бандажэўскага вязьнем сумленьня, які пацярпеў за тое, што паведамляў праўдзівую навуковую інфармацыю пра нэгатыўны ўплыў радыяцыі на здароўе людзей і крытыкаваў палітыку ўладаў у гэтай галіне. Аднак спробы грамадзкасьці дабіцца адмены прысуду спадару Бандажэўскаму плёну не прынесьлі.
XS
SM
MD
LG