Лінкі ўнівэрсальнага доступу

“Будзем знаёміць беларусаў зь літоўскай культурай”


Эдмінас Багдонас

Эдмінас Багдонас

Канцэртам ансамбля песьні і танца “Летува” завяршыліся імпрэзы да 15-годзьдзя ўсталяваньня дыпляматычных дачыненьняў паміж Літвой і Беларусьсю.


Канцэрт адбыўся ў Беларускай дзяржаўнай фільгармоніі. “Летува” — гэта прафэсійны зводны ансамбаль мастацтваў, які ўключае ў сябе харэаграфічную групу, аркестар народных інструмэнтаў і хор. Ансамбаль створаны 67 гадоў таму вядомым дасьледчыкам літоўскага народнага мастацтва, таленавітым кампазытарам, прафэсарам Ёнасам Швядасам. “Летува” правяла больш за восем тысяч канцэртаў ня толькі ў Літве, але і ў 34 краінах сьвету.

Амбасадар Літвы ў Беларусі Эдмінас Багдонас лічыць “Летуву” нацыянальным скарбам Літвы.

“Я рады, што ў нас ёсьць такая магчымасьць прадставіць самае прыгожае і лепшае, што мы маем. І я вельмі рады, што беларускія гледачы могуць бачыць культуру Літвы. Літоўцы кантактуюць зь беларусамі, і гэта вельмі важна — пазнаюць адзін аднаго праз культуру, каб збліжацца, а не адасабляцца. Мы такую задачу ўвесь час і ставім — як мага лепш ведаць адны адных”.

Соўсь: “У рамках адзначэньня 15-годзьдзя дыпляматычных дачыненьняў паміж нашымі краінамі літоўская амбасада прадставіла для беларусаў вельмі шырокі спэктар літоўскай культуры — і жывапіс, і тэатар, і джаз, і клясычная музыка, і народныя танцы і сьпевы...”

Багдонас: “Усё тое, што ў нас ёсьць, чым мы можам ганарыцца, мы і паказалі. Апошнім быў вельмі папулярны дзяржаўны ансамбаль песьні і танца “Летува”, яму ўжо 67 гадоў. 7 сьнежня яны выступаюць у Горадні. Сьвяткаваньне — сьвяткаваньнем. Я буду і надалей як мага болей знаёміць беларускіх гледачоў зь літоўскай культурай — жывапісам, тым жа джазам. Самыя розныя праекты ў нас абмяркоўваюцца”.

Соўсь: А Вам асабіста якая імпрэза была найбліжэйшая?”

Багдонас: “Асабіста я вельмі люблю клясычную музыку. У Менску выступаў квартэт Чурлёніса, наш драматычны тэатар цудоўную п’есу паказаў. Што мне падабаецца, гэта іншая справа. Для мяне галоўнае, каб увесь спэктар прадставіць...” — кажа літоўскі амбасадар.


Мерапрыемствы з нагоды 15-годзьдзя ўсталяваньня дыпляматычных дачыненьняў паміж Літвой і Беларусьсю распачаліся ў чэрвені шэрагам канцэртам знакамітых выканаўцаў джазу — Алега Малакаедава, Леаніда Шынкарэнкі, Вітаўтаса Лабуціса, Вітаўтаса Грыбляўскаса ды іншых. У кастрычніку ў Музэі сучаснага выяўленчага мастацтва зрабілі ўнікальную выставу “Экспрэсія Ніды”, у фільгармоніі выступіў знакаміты квартэт імя Чурлёніса. У лістападзе ў тэатры Янкі Купалы п’есу “Эліта” прадставіў Літоўскі нацыянальны драматычны тэатар. У Нацыянальным мастацкім музэі адкрылася выстава Мсьціслава Дабужынскага “Старая Літва”, а ў сьнежні ў каледжы мастацтваў прайшла выстава нацыянальнай мастацкай школы імя Чурлёніса.
  • 16x9 Image

    Ганна Соўсь

    Ганна Соўсь нарадзілася ў Менску. Скончыла факультэт журналістыкі БДУ. Працавала ў незалежнай газэце «Народная воля»(1997-2000). Ад 2000 году працуе на «Свабодзе». Кнігі на «Свабодзе» — «Дарога праз Курапаты» (аўтарка рэпартажаў), «Адзін дзень палітвязьня» (ідэя і ўкладальніца), «Адзін дзень палітвязьня. 2009-2011»(ідэя і ўкладальніца), «Жыцьцё пасьля раку» (аўтарка ідэі і каардынатарка праекту, рэдактарка). Аўтарка праекту «Расея і я», сэрыі інтэрвію з 12 экс-прэзыдэнтамі постсавецкіх кранаў. Сябра БАЖ.

XS
SM
MD
LG