Лінкі ўнівэрсальнага доступу

На Кастрычніцкай плошчы Менску сёньня адбыўся мітынг прадпрымальнікаў супраць палітыкі ўладаў у дачыненьні да малога бізнэсу ў Беларусі.


Прадпрымальнікі прынялі рэзалюцыю з патрабаваньнем адмяніць Указ № 760, паводле якога забараняецца наймаць на працу несваякоў. Перамовы паміж прадпрымальнікамі і чыноўнікамі маюць прайсьці 19 сьнежня.

У мітынгу на Кастрычніцкай плошчы ўзялі ўдзел некалькі дзясяткаў чалавек. Каля плошчы стаяла машына з гукаўзмацняльнай апаратурай, адкуль безь перапынку гучалі пагрозы ўдзельнікам акцыі за парушэньне закону аб масавых мерапрыемствах. З Аляксандраўскага сквэру разносілася музыка. Часам удзельнікам акцыі даводзілася крычаць на вуха, каб пачуць адзін аднаго.

Заяўнікі акцыі, лідэр якіх, Аляксандар Макаеў, знаходзіўся ў міліцыі, прамаўлялі з прыступак Палацу Рэспублікі.

Выступоўца: “Я веру, што з намі Бог. Давайце будзем разам, будзем зьяднаныя. Давайце выходзіць на плошчы і бараніць свае правы. Калі мы зьяднаныя, мы непераможныя”.

У натоўпе і навокал было некалькі дзясяткаў супрацоўнікаў міліцыі ў цывільным. Байцоў спэцназу міліцыі пазнавалі па аднолькавых новых красоўках.

Байцоў спэцназу міліцыі пазнавалі па аднолькавых новых красоўках.


Прадпрымальнікі, сярод якіх было шмат жанчын, казалі, што разьлічвалі на большую колькасьць удзельнікаў акцыі.

Спадарыня: “Астатнія да нас сёньня не далучыліся папросту ад страху. Людзі баяцца, а чыноўнікі гэтым карыстаюцца. Чыноўнікі — гэта, вядома, страшная сіла. Яны адпрацоўваюць свае крэслы. Яны баяцца, што сёньня яны пад імі хістаюцца. Таму яны зрабілі ўсё магчымае, каб людзі спалохаліся і не прыйшлі”.

Нягледзячы на ўсе захады, каб іх запалохаць, людзі не разыходзіліся.

Спадарыня: “Я прадавачка. Застаюся бяз працы. Майму дзіцяці паўтара гады. Куды я магу пайсьці са сваёй адукацыяй? Я працавала на гадзіньнікавым заводзе “Луч”. Цяпер ён банкрут. Дзе Лукашэнка дасьць мне працоўнае месца? Мне трэба карміць дзіця. Я маці-адзіночка”.

Да мітынгоўцаў выйшлі прадстаўнікі Менгарвыканкаму і Міністэрства эканомікі.

“Працуе рабочая група. Кабякоў узначальвае. Разгледзім і канструктыўна ўсё ўлічым. Бліжэйшым часам зьбяром існуючую працоўную групу пры Дэпартамэнце. Калі ласка, рыхтуйце свае пазыцыі, свае прапановы”.

На мітынгу прынялі рэзалюцыю з заклікам да беларускага ўраду стварыць спрыяльную для бізнэсу заканадаўчую базу. Удзельнікі мітынгу панесьлі рэзалюцыю ў Палату прадстаўнікоў праспэктам Незалежнасьці. Колькасьць удзельнікаў акцыі адразу вырасла. Паводле ацэнак журналістаў і назіральнікаў, на плошчы Незалежнасьці было ўжо больш за пяць соцень. Віктар Гарбачоў зьвярнуўся да прысутных:

“Перамоўная група для вырашэньня канфліктнай сытуацыі прынятая. Зарэгістраваны дакумэнт у Палату прадстаўнікоў з пячаткай. Усё як мае быць. Рэзалюцыю прынялі, першы крок зроблены. Намі будзе сфармаваная група індывідуальных прадпрымальнікаў на 19 сьнежня на перамовы з урадам дзеля вырашэньня канфлікту”.

На Кастрычніцкай плошчы і пасьля заканчэньня акцыі затрымалі палітыкаў Віктара Івашкевіча і Крысьціну Шацікаву, прадпрымальнікаў Віктара Крываля, Віктара Гарбачова і Віктара Калея, а таксама журналіста Барыса Гарэцкага. Салігорскі прадпрымальнік Аляксандар Цацура быў затрыманы прэвэнтыўна напярэдадні акцыі.

Паказаць камэнтары

XS
SM
MD
LG