Лінкі ўнівэрсальнага доступу

Што менчукі ведаюць пра Ніязава?


Радыё Свабода Што вы ведаеце пра Ніязава й жыцьцё туркмэнскага народу? Гэтае пытаньне людзям на вуліцах Менску задавала Галіна Абакунчык.

(Юнак: ) “Ведаю, што прэзыдэнт Туркмэністану — асоба вядомая ва ўсясьветнай палітыцы, у дыпляматыі. Таму Туркмэністану, відаць, давядзецца цяжка пасьля яго сьмерці”.

(Спадар: ) “Людзі нармалёва жылі й яго хвалілі”.

(Юначка: ) “Пра краіну крыху ведаем, а пра прэзыдэнта — не”.

(Юнак: ) “Туркмэністан — краіна аднаго кіраўніка, бо ён праводзіў толькі сваю палітыку. Адначасна, мне падаецца, што яна была вельмі эфэктыўная”.

(Спадарыня: ) “Нічога не магу сказаць, нічога ня ведаю”.

(Спадар: ) “Нават ня ведаю што сказаць. Мне больш дармавы газ падабаецца, як у Туркмэніі. А астатняе — складанае пытаньне”.

(Юнак: ) “Ведаю, што ён пры жыцьці ставіў сабе залатыя помнікі й тое, што культ асобы быў відавочны. Зразумела, што ягоны рэжым не глядзеў ні на якія правы чалавека й на выкананьне міжнародных дамоўленасьцяў. Магчыма, гэтая трагічная падзея стане штуршком для разьвіцьця Туркмэністану”.

(Карэспандэнтка: ) “Што вы ведаеце пра Ніязава й жыцьцё туркмэнскага народу?”

(Юнак: ) “Я амаль нічога ня ведаю, бо ў нас пра гэта нічога не паведамляюць”.

(Спадарыня: ) “Я ведаю, што там дармавы газ, што ён шмат робіць для людзей, як кажуць нашы радыё й тэлебачаньне. Але дэмакратыі там ніякай няма і ўсё скіравана на ўсхваленьне аднаго чалавека. Але народу, відаць, падабалася ягонае кіраваньне, бо я ня чула, каб там нейкія пратэсты былі”.

(Спадар: ) “Мяне больш хвалююць праблемы сваёй краіны. А такіх прэзыдэнтаў я не ўхваляю, у тым ліку й Ніязава”.

(Спадар: ) “Магчыма, туркмэнскі народ згадае, што ў кожнага грамадзяніна ёсьць свой уласны бацька, а ня толькі Туркмэнбашы. Быць можа, штосьці зьменіцца да лепшага. Гэта багатая краіна, яна мае газ. Грэх так казаць, але, магчыма, гэта такі падарунак туркмэнскаму народу да Новага году”.
XS
SM
MD
LG