Лінкі ўнівэрсальнага доступу

Заўтра ў Рызе пачнецца двухдзённы саміт НАТО


Юры Сьвірко, Рыга У панядзелак у сталіцы Латвіі ўжо распачаліся мерапрыемствы, зьвязаныя з чарговым самітам НАТО. Хаця сам саміт пройдзе ў аўторак і сераду, у Рыгу ўжо прыляцеў генэральны сакратар Альянсу Яап дэ Хоп Схефэр.

Прэзыдэнтка Латвіі Вайра Віке-Фрэйбэрга – гаспадыня саміту, правяла прэсавую канфэрэнцыю, на якой распавяла пра галоўныя мэты і тэмы саміту. Найперш гэта аўганскае пытаньне – што рабіць зь сіламі НАТО ў Аўганістане: выводзіць ці не. Таксама будуць абмяркоўвацца пытаньні пара сытуацыю ў Іраку і Косаве.

Гэта першы саміт, які адбываецца на тэрыторыі былога Савецкага Саюзу і першы саміт, які адбываецца ў краіне, суседняй зь Беларусьсю. Гэта таксама падкрэсьліла прэзыдэнтка Латвіі Вайра Віке-Фрэйбэрга. Аднак яна нагадала, што гэта саміт толькі краінаў-сябраў альянсу, на яго не запрошаныя ані Расея, ані Ўкраіна.

У той жа час у Рыгу прыехала сьпікер грузінскага парлямэнту Ніно Бурджанадзэ. Яна ладзіць тут шматлікія прэсавыя канфэрэнцыі, уся Рыга абклееная плякатамі "НАТО! Не забудзь пра Грузію!" на ангельскай і латыскай мовах.

Паралельна з самітам адбываюцца іншыя падзеі, кшталту форуму маладых лідэраў і сустрэчаў зь вядомымі людзьмі. Напрыклад, Аляксандар Мілінкевіч, лідэр беларускай апазыцыі, таксама запрошаны ў Рыгу і мае тут асобную праграму.

Прэзыдэнтка Латвіі на прэсавай канфэрэнцыі сказала, што пытаньне пашырэньня Альянсу будзе абмяркоўвацца на саміце, але не ў канкрэтных тэрмінах. Яна не чакае, што будзе запрошаная Грузія. Украіна тут наагул не абмяркоўваецца, у сувязі з палітычнай сытуацыяй у Кіеве, бо прэм’ер-міністар Украіны Віктар Януковіч выступае супраць далучэньня Ўкраіны да НАТО.

У той жа час спадарыня Віке-Фрэйбэрга была даволі дыпляматычнай, яна сказала, што на саміце магчымыя ўсялякія рашэньні, у тым ліку і нечаканыя. Але яна падкрэсьліла, што гэта наўрад ці будзе саміт сюрпрызаў і нечаканасьцяў.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG