Лінкі ўнівэрсальнага доступу

Недзяржаўныя газэты ня трапілі ў падпісны каталёг


Паводле Прэсавай службы Беларуская асацыяцыя журналістаў Дзяржаўнае прадпрыемства-манапаліст паштовай сувязі "Белпошта" адмовілася супрацоўнічаць зь недзяржаўнымі газэтамі "Народная воля", "Наша Ніва", "Товарищ", "СНплюс. Свободные новости плюс". У падпісным каталёгу не аказалася таксама каля дзясятка рэгіянальных незалежных выданьняў: "Брестский курьер", "Витебский курьер", "Борисовские новости", "Газета Слонимская", баранавіцкая газета "Intex-press", "Ляхавіцкі час", "Вольнае Глыбокае”, "Ганцавіцкі час", пінскі тыднёвік "Мясцовы час".

На просьбы рэдакцый і на патрабаваньні чытачоў уключыць газэты ў каталёг кіраўніцтва "Белпошты" адказвае: "у сувязі з тым, што абавязак па ўключэньні друкаванага выданьня ў каталёг не прадугледжаны заканадаўствам, выбар друкаваных выданьняў для фармаваньня каталёгу з мэтай наступнага іх распаўсюджаньня праз падпіску зьяўляецца правам РУП "Белпошта", якое рэалізуецца ім у адпаведнасьці з заканадаўствам".

Некаторыя рэдакцыі да гэтага часу не атрымалі пісьмовага адказу ад паштовага прадпрыемства.

У ліпені галоўныя рэдактары некалькіх недзяржаўных газэт зьвярнуліся зь лістом да прэзыдэнта Беларусі з просьбай паспрыяць вырашэньню праблемы. Адказ яны атрымалі ад намесьніцы міністра інфармацыі Лідзіі Ананіч, якая сьцьвярджала, што "Мiнiнфарм ня мае права ўмешвацца ў дзейнасьць самастойных суб''ектаў гаспадараньня i змушаць iх заключаць дамовы".

Нагадаем: год таму падчас фармаваньня падпіснога каталёгу на 2006 год "Белпошта" таксама адмовілася ўключыць у яго шэраг недзяржаўных газэт, а з тымі выданьнямі, на якія падпіска вялася, памянёнае прадпрыемства тэрмінова і ў аднабаковым парадку скасавала дамовы на распаўсюд на пачатку 2006 году.

У Законе "Аб паштовай сувязі" пазначана, што любая газета, якая выдаецца на тэрыторыі Беларусі і зарэгістравана Мінінфармацыі, мае права на разьмяшчэньне яе ў Каталёгу для арганізацыі падпіскі і дастаўкі адрасату. Закон забясьпечвае мажлівасьць распаўсюду друкаваных СМІ. Артыкулы 12, 14, 26 Закону “Аб паштовай сувязі” гарантуюць забеспячэньне роўнага доступу для ўсіх карыстальнікаў паштовай сувязі.
XS
SM
MD
LG