Лінкі ўнівэрсальнага доступу

Ці магчыма перапыніць продаж сурагатных напояў?


Галіна Абакунчык, Менск Ці магчыма перапыніць продаж сурагатных напояў? Як гэта можна зрабіць? Гэтае пытаньне людзям на вуліцах Менску задавала наша карэспандэнтка.

(Юначка: ) “Так, я думаю, што гэта магчыма, але ў нашай краіне гэта адбудзецца ня вельмі хутка. Бо алькаголь у нас стаў такой базіснай рэччу, як, да прыкладу, нерухомасьць”.

(Юнак: ) “Верагодна, што так. Але для гэтага неабходная пэўная дзяржаўная палітыка. А як дакладна, я, па праўдзе сказаць, нават не задумваўся”.

(Юначка: ) “Ня ведаю, але, пэўна, так. Гэта дзяржава павінна рабіць. Ну і грамадзтва павінна нейкія высілкі прыкласьці”.

(Спадар: ) “Ня ведаю, але, пэўна, гэта нерэальна. Народ як гнаў самагонку, так і будзе гнаць. Трэба падвышаць культуру піцьця. Каб былі адпаведныя ўстановы, каб людзі не імкнуліся піць таннае пойла”.

(Спадарыня: ) “Мне падаецца, што кожны на сваім месцы павінен сачыць, пачынаючы ад сям’і, школы і гэтак далей. А моладзь, што п’е, трэба загрузіць працай так, каб не хадзілі і не пілі”.

(Юнак: ) “Я, да прыкладу, ведаю, што ў бабуляў прадаюць падпольна. Яе сыны прывозяць з Расеі і прадаюць тут. Сівуха называецца, па 2,5 тысячы, а ў нас па 5. Але, пэўна, зрабіць яшчэ больш таньнейшай гарэлку таксама немагчыма. Проста ўчастковыя ведаюць такія рэчы і павінны іх адсочваць ды выкараняць”.

(Юнак: ) “Трэба сапраўдную гарэлку маркіраваць адмыслова, каб людзі ведалі, што іншай можна атруціцца”.

(Спадар: ) “Найперш трэба стварыць культуру піцьця: адкрыць адмысловыя ўстановы, каб чалавек мог выпіць і закусіць. Паглядзіце за мяжой – так нічога гэтага не забаронена, і людзей п’яных няма. Толькі культура піцьця, і ўсё”.

(Юнак: ) “Тыя людзі, якія ня маюць дастаткова грошай, яны і набываюць танныя сурагатныя напоі, каб на астатнія грошы існаваць. Трэба падвышаць заробкі”.

(Юначка: ) “Мне падаецца, што адзін з крокаў на гэтым шляху – гэта аднавіць продаж алькаголю ў начны час. Бо людзі ўсё роўна шукаюць гэты алькаголь і знаходзяць, не зважаючы на якасьць”.
XS
SM
MD
LG