Лінкі ўнівэрсальнага доступу

Джорджа Ля Мальфа: Беларусь павінна дазволіць Віцы вярнуцца ў Італію


Аляксей Дзікавіцкі, Варшава Міністар у справах Эўрапейскага зьвязу Ітаіі Джорджа Ля Мальфа ў інтэрвію нашаму радыё заявіў, што канфлікт вакол вяртаньня Вікі Мароз у Беларусь не паўплывае дрэнна на беларуска-італьянскія дачыненьні. На думку міністра, аднак, Беларусь павінна дазволіць Віцы Мароз вярнуцца ў Італію.

На пытаньне, якое ягонае меркаваньне пра сытуацыю вакол вяртаньня ў Беларусь Вікі Мароз, Джорджа Ля Мальфа адказаў:

(Ля Мальфа: ) "Ведаеце, з пункту гледжаньня закону, нашых добрых дачыненьняў зь Беларусьсю, гэта было правільнае рашэньне. Але калі паглядзець на гэта, беручы пад увагу лёс беларускай дзяўчынкі, я быў вельмі крануты ўсёй гэтай сытуацыяй, бо было відаць, што дзяўчынка вельмі шчасьлівая ў сваёй новай сям''і, і рашэньне аб вяртаньні было цяжкім. Таму мы павінны выпрацаваць такі мэханізм, які б дазволіў дзяўчынцы застацца ў Італіі, калі яна гэтага хоча".

Міністар Джорджа Ля Мальфа лічыць, што складаная сытуацыя, якая склалася вакол вяртаньня Вікі Мароз, не паўплывае на жаданьне італьянцаў дапамагаць у аздараўленьні чарнобыльскіх дзяцей.

(Ля Мальфа: ) "Гэта было правільнае рашэньне што да ўратаваньня праграмаў, па якіх Італію наведваюць сотні беларускіх дзяцей. Мая краіна выказала павагу да беларускай дзяржавы, дапамагаючы ў вяртаньні Вікі Мароз на радзіму. Цяпер чарга Беларусі, якая павінна была б дазволіць ёй вярнуцца ў Італію і быць шчасьлівай з новымі бацькамі".

На пытаньне, ці лягчэй было б супрацоўнічаць Італіі зь Беларусьсю, калі б у Беларусі панавала дэмакратыя, італьянскі міністар адказаў.

(Ля Мальфа: ) "Безумоўна, калі краіны падзяляюць і шануюць аднолькавыя каштоўнасьці, супрацоўнічаць значна лягчэй".

А чаму ўвогуле менавіта Італія так актыўна дапамагае ў аздараўленьні беларускіх дзяцей?

(Ля Мальфа: ) "Справа ў тым, што ў італьянцы маюць моцнае пачуцьцё неабходнасьці дапамагаць іншым. Калі краіна так церпіць, як Беларусь пасьля Чарнобыльскай катастрофы, для нас важна працягнуць руку дапамогі, калі гэта магчыма. Мы лічым гэта вельмі важным".
XS
SM
MD
LG