Лінкі ўнівэрсальнага доступу

Таксістам без ліцэнзіяў абвясьцілі вайну


Ігар Карней, Менск Ад сёньняшняга дня па ўсёй Беларусі абвяшчаецца вайна ўладальнікам аўто, якія без адпаведнай ліцэнзіі возяць пасажыраў. Як мяркуюць у дзяржаўных таксапарках, у адным толькі Менску канкурэнцыю ім складаюць больш за тры тысячы “нелегалаў”. За незаконнае таксаваньне Адміністрацыйны кодэкс прадугледжвае штраф да 50 базавых велічыняў. У рэцыдывістаў рашэньнем суду можа быць сканфіскаваны аўтамабіль.

Спэцапэрацыяй дзеля выяўленьня падпольных таксовак кіруе Міністэрства ўнутраных справаў. Асноўная роля падчас рэйдаў адведзеная дружыньнікам, якія будуць сачыць за падазронымі аўтамабілямі, а таксама выконваць ролю пасажыраў. На заключным этапе плянуецца падключаць брыгады Дзяржаўтаінспэкцыі. Гаворыць прадстаўніца ДАІ Ганна Банадык:

(Банадык: ) “Так, сёньня пачынаецца гэта працэс. Апроч ДАІ, па нелегалах будуць працаваць таксама дружыньнікі й прадстаўнікі таксапаркаў. Я не магу сказаць, што гэта будзе рабіцца круглыя суткі. Але што гэтаму будзе надавацца пэўная колькасьць часу кожны дзень — гэта факт”.

Камэрцыйным падвозам пасажыраў у Беларусі займаюцца тры катэгорыі таксістаў — кіроўцы дзяржаўных таксаматорных паркаў, ўладальнікі прыватных аўтамабіляў, якія плацяць падаткі й маюць ліцэнзіі на гэты від дзейнасьці, і так званыя нелегалы, якія таксуюць на прыватных машынах бяз жоўтых налепак. Як кажуць прадстаўнікі легальнай часткі таксовак, апошнія забіраюць да траціны агульных прыбыткаў.

(Таксіст: ) “Падатак жа ўсе павінны плаціць. Бо ў іншым выпадку падаткі нашы проста абясцэньваюцца. Мы плацім, а яны — не. І, канечне, перашкаджаюць. Бо мы, дапусьцім, стаім, чакаем кліента, а ён — раз наперад, і таньней можа адвезьці. А мы зноў стаім і чакаем. Крадуць наш час. Праўда, яны пераважна па ўскрайках гораду езьдзяць, у цэнтры меней”.

(Іншы таксіст: ) “Усе гэтыя рэйды апраўданыя. Яны наш хлеб забіраюць, чаго іх шкадаваць?”

(Карэспандэнт: ) “Па-вашаму, кіроўцаў, якія працуюць безь ліцэнзіі, шмат? І яны сапраўды вам сур’ёзныя канкурэнты?”.

(Таксіст: ) “Працэнтаў трыццаць яны ў нас перабіваюць. Бо сярод пяці машынаў нармалёвых, зь ліцэнзіямі, абавязкова знойдуцца тры звычайныя, не пазначаныя адмысловымі знакамі, што гэта таксоўка”.

(Карэспандэнт: ) “Бачыце вы такога нелегала — што можаце зрабіць?”

(Таксіст: ) “Перадусім, на гэта ёсьць улады. А што я буду рабіць? Прабачце, морду біць, ці што? Дык гэта ўжо крымінальны артыкул супраць мяне будзе”.

Кіраўнік Асацыяцыі кіроўцаў і ўладальнікаў аўтатранспарту Алег Маркевіч гатовы кансультаваць абедзьве катэгорыі таксістаў. З досьведу ранейшых рэйдаў спадар Маркевіч усё ж раіць нелегалам не рызыкаваць, каб ня страціць апошняга. А што да легальных прыватнікаў, то, паводле Маркевіча, ня трэба быць такімі катэгарычнымі хоць бы на прыкладзе таксі “052”: выплата падаткаў не перашкодзіла ўладам пазбавіць таксістаў радыёчастаты.

(Маркевіч: ) “Ідзе палітыка зацісканьня гаек. Мы бачым, як пазбаўляюць ліцэнзіяў камэрцыйныя структуры, бачым, як пагаршаецца агульны эканамічны клімат у Рэспубліцы Беларусь. Таму цяпер у Беларусі лепш нічым не займацца — цалейшыя будуць грошы. Паверце мне”.

Ужо ёсьць выпадкі, калі кіроўцаў прыцягвалі да адміністрацыйнай адказнасьці за парушэньне правілаў прадпрымальніцкай дзейнасьці. Санкцыі — штрафы ад 20 да 50 базавых велічыняў. Ёсьць прэцэдэнты, калі за паўторнае парушэньне заканадаўства ўжывалася крайняя мера — канфіскацыя аўтамабіля.

МУС Беларусі агучыў прапанову дзяржаўных таксаматорных паркаў: крымінальная адказнасьць за прыватны падвоз пасажыраў за плату, пры гэтым — абавязковая канфіскацыя аўтатранспарту. Дзеля ўдасканаленьня прававой базы ў галіне супрацьдзеяньня нелегальнаму падвозу міністар Уладзімер Навумаў лічыць, што трэба падрыхтаваць адпаведны зварот да Аляксандра Лукашэнкі як суб’екта заканадаўчай ініцыятывы.
XS
SM
MD
LG