Лінкі ўнівэрсальнага доступу

Літва шукае новую кандыдатуру на пасаду амбасадара ў Беларусі


Тацяна Поклад, Вільня Міністэрства замежных справаў Літвы шукае новага кандыдата на пасаду амбасадара Літвы ў Беларусі, атрымаўшы ясны сыгнал зь Менску, што Антанас Валёніс (на фота) будзе непажаданым на гэтай пасадзе.

Дагэтуль меркавалася, што новым амбасадарам у Менску будзе Антанас Валёніс, былы міністар замежных справаў Літвы. Як паведамляе інфармацыйнае агенцтва БНС, літоўскае МЗС вырашыла не прасіць агрэмана кандыдатуры А.Валёніса, паколькі прадбачыць адмоўны адказ і не жадае абвастраць дачыненьні з суседняй краінай.

У Літве памятаюць, што Беларуская дзяржаўная тэлевізія абвінаваціла Антанаса Валёніса, тагачаснага міністра замежных справаў Літвы, у тым, што ён нібыта арганізоўваў масавыя пратэсты супраць парушэньняў у часе прэзыдэнцкіх выбараў у сакавіку.

Пасьля зьмены ўраду ў Літве ён пакінуў пасаду кіраўніка дыпляматычнага ведамства і вярнуўся ў Сойм, цяпер ён парлямэнтар, уваходзіць у Сойме ў фракцыю сацыял-лібералаў. У сярэдзіне верасьня парлямэнцкі камітэт замежных справаў Літвы пацьвердзіў кандыдатуру А.Валёніса на пасаду амбасадара ў Беларусі.

Тады сам А.Валёніс казаў, што спадзяецца на хуткі адказ зь Беларусі адносна яго кандыдатуры і тлумачыў, што калі краіна ня згодная прыняць прапанаванага дыплямата, яна марудзіць зь перасылкай ліста са згодай на яго кандыдатуру, які завецца агрэман, і гэта ў дыпляматаў расцэньваецца як адмова.

У Літве амбасадараў прызначае і вызваляе з пасады прэзыдэнт краіны паводле прапановы ўраду і пры пацьверджаньні кандыдатуры парлямэнцкім камітэтам замежных справаў.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG