Лінкі ўнівэрсальнага доступу

Прыднястроўе выказалася за незалежнасьць. Што далей?


Вячаслаў Ракіцкі, Прага Болей як 97 працэнтаў жыхароў Прыднястроўя выказаліся за незалежнасьць і наступнае далучэньне да Расеі. Такія папярэднія вынікі рэфэрэндуму, які адбыўся ў нядзелю ў гэтай непрызнаванай рэспубліцы.

Афіцыйны Кішынёў не прызнаў рэфэрэндуму. Міністар замежных справаў і эўрапейскай інтэграцыі Малдовы Андрэй Стратан назваў апытаньне “палітычным фарсам” і заявіў, што “ўчорашні дзень нічога ня зьменіць”. Заходнія краіны таксама адмовіліся прызнаваць рэфэрэндум і заклікалі Прыднястроўе вярнуцца да перамоваў з Кішынёвам.

Лідэр жа сэпаратысцкай рэспублікі Ігар Сьмірноў настойвае на праве самавызначэньня праз рэфэрэндум.

(Сьмірноў: ) “Вас не зьдзіўляе, што многія былыя рэспублікі Савецкага Саюзу вызначыліся самі, не запытаўшы ў народу? Тыя ж Украіна, Малдова: мы ідзем у НАТО, Эўрапейскі Зьвяз, не правёўшы рэфэрэндуму. Мы ж праводзім рэфэрэндум. І гэта чамусьці выклікае нездаровы ажыятаж, асабліва ў праціўнікаў народакіраваньня, я сказаў бы”.

Вынікі былі прадказальнымі. Але больш важна, ці будуць яны прызнаныя.

Віцэ-сьпікер Дзяржаўнай думы Расеі Сяргей Бабурын заявіў сёньня, што Дума павінна зьвярнуцца да ўраду з просьбай афіцыйна прызнаць Рэспубліку Прыднястроўе. На ягоную думку, калі Расея праігнаруе, як ён выказаўся, “думку сваіх суайчыньнікаў”, дык “зробіць гістарычную памылку”.

Падобныя рэакцыі не выпадковыя, калі ўлічваць пастаўленьне Расеі ў гэтым рэгіёне. Каля тысячы чалавек сталі ахвярамі кароткай, але крывавай вайны паміж расейскімі сэпаратыстамі і Малдовай у 1992 годзе. Гвалт спынілі расейскія войскі, разьмешчаныя ў Прыднястроўі. І там да сёньняшняга дня застаюцца прыблізна тысяча дзьвесьце расейскіх жаўнераў. Расейскамоўнае Прыднястроўе атрымлівае моцную, хоць і неафіцыйную падтрымку з Расеі.

Аналітыкі выказваюць меркаваньне, што калі Расея прызнае вынікі рэфэрэндуму ў Прыднястроўі, дык гэта моцна паўплывае на іншыя “замарожаныя канфлікты” ў рэгіёне. Яшчэ адна прарасейская непрызнаваная рэспубліка – Паўднёвая Асеція – заплянавала на лістапад рэфэрэндум пра незалежнасьць ад Грузіі. Пазыцыя яе кіраўніцтва таксама знаходзіць падтрымку ў Маскве, якая разглядае такія рэфэрэндумы як шанец больш шчыльна зьвязаць гэты рэгіён з Расеяй.

Але нават калі гэта ня ёсьць выпадкам расейскага рэваншызму, усё роўна неразьвязаныя канфлікты з Прыднястроўем ці Абхазіяй ускладняюць праблему далучэньня Малдовы і Грузіі да Эўрапейскага Зьвязу ці НАТО.

Тым часам безадносна ад расейскіх намераў прыднястроўскія сэпаратысты мяркуюць, што вынікі ўчорашняга рэфэрэндуму падмацуюць іхныя аргумэнты на перамовах пры пасярэдніцтве АБСЭ.
XS
SM
MD
LG