Лінкі ўнівэрсальнага доступу

Апытаньне Свабоды: якія асноўныя праблемы сучаснай беларускай школы?


Галіна Абакунчык, Менск Якія асноўныя праблемы сучаснай беларускай школы? Гэтае пытаньне менскім мінакам задавала наша карэспандэнтка.

(Юнак: ) “У кожнай школе па-рознаму можа быць. Да прыкладу, праблемы ў навучальным працэсе, праблемы з харчаваньнем. Больш нічога сказаць не магу”.

(Спадарыня: ) “Праблемы, канечне, ёсьць. Да прыкладу, праграма, якая ёсьць у школе і праграма, неабходная для паступленьня ў інстытут – гэта дзьве розныя рэчы. Таксама асноўная частка настаўнікаў школаў закончылі інстытут у 60-70-гадах. Натуральна, што нейкімі новымі мэтадамі выкладаньня яны не карыстаюцца. Натуральна, што ад гэтага церпіць і якасьць навучаньня”.

(Юнак: ) “Зашмат нагрузкі ў школе, шмат лішніх дысцыплінаў. Да прыкладу, руская мова й літаратура. Табліцу памнажэньня, канечне, трэба ведаць, але навошта ў матэматыцы розныя інтэгралы? Нічога карыснага яны не даюць”.

(Юнак: ) “Думаю, што адной з праблемаў сталася тое, што зьявілася дзесяцібальная сістэма. А другое, гэта тое, што ўведзеныя тэсты. Гэта ўскладніла жыцьцё дзецям, а таксама іх бацькам”.

(Карэспандэнтка: ) “Якія асноўныя праблемы сучаснай беларускай школы?”

(Спадарыня: ) “Я яе даўно ўжо закончыла, але праз унука ведаю, што бываюць праблемы. У дзяцей свае погляды, а ў настаўнікаў, асабліва старэйшага веку свае. А маладое пакаленьне імкнецца ж да новых ведаў”.

(Спадар: ) “Недастатковае фінансаваньне, школы і, адпаведна, паборы. Прыходзіш на сход і гэтыя арганізацыйныя пытаньні – колькі й на што здаць – абмяркоўваюцца больш за ўсё. Натуральна, што гэта адрывае настаўнікаў ад навучальнага працэсу. Адпаведна, у іх няма індывідуальнага падыходу да дзяцей. Лічыцца, што адукацыя ў нас бясплатная, але за ўсё даводзіцца плаціць”.

(Спадар: ) “Канечне, ёсьць праблемы. Па-першае, сярэдняя адукацыя не адпавядае патрабаваньням, якія выстаўляюць абітурыентам. І, натуральна, чалавеку, які не патраціць нейкую колькасьць грошай на хабар альбо на рэпэтытара, вельмі цяжка паступіць. І па-другое, сам падыход да адукацыі, мне падаецца, ён не гуманны, і многія пэдагогі не адпавядаюць тым патрабаваньням, якія выстаўляюцца сучаснаму настаўніку. Я сам паводле адукацыі пэдагог і школу закончыў ня так даўно, 10 год таму, ня думаю, што там за гэты час нешта зьмянілася”.
XS
SM
MD
LG