Лінкі ўнівэрсальнага доступу

Сям’я астравецкага актывіста Івана Крука ня ведае, дзе ён адбывае пакараньне


Міхал Карневіч, Горадня Сёньня ўжо дзясяты дзень, як астравецкі дэмакратычны актывіст Іван Крук адбывае пакараньне, але сям’я дагэтуль ня ведае, у якой папраўчай установе. Нагадаю, што 15 траўня яго асудзілі на 6 месяцаў арышту за гвалтоўныя дзеяньні супраць міліцыянтаў.

Жонка Івана Крука Вольга дзясяты дзень чакае, што зь міліцыі ёй дашлюць нейкі ліст, у якім паведамяць, дзе адбывае пакараньне ейны муж. У панядзелак 10 ліпеня Іван Крук зьявіўся ў Астравецкі райаддзел міліцыі, адкуль яго ў той жа дзень этапавалі ў Смаргонскі сьледчы ізалятар. Сын Аляксандар таксама чакае зьвестак ад бацькі.

(Аляксандар: ) “Не, нічога пакуль не чуваць”.

Адвакат Алена Халупка зьдзіўленая, што мінула дзесяць сутак, а сям’і Івана Крука дагэтуль не паведамілі, дзе ён. Яна думае, што хутчэй ён напіша ліст сам.

(Халупка: ) “Тут сытуацыя такая, што ліставаньне там не забароненае. Так што, магчыма, ён сам хутка дашле ліст”.

У пятніцу ў пракуратуру зноў выклікаюць сына Івана Крука Аляксандра. Нагадаю, што на яго паўторна завялі крымінальную справу і вінавацяць у крадзяжы грошай. Першы раз справа была закрытая пасьля таго, як Івана Крука асудзілі, але калі ён падаў апэляцыю ў абласны суд, супраць ягонага сына зноў пачалі крымінальную справу.

Нагадаю, што падчас прэзыдэнцкай выбарчай кампаніі ў кватэры Івана Крука праводзілі ператрус у сувязі са справай сына. Нічога не знайшлі, але сканфіскавалі некалькі асобнікаў недзяржаўных бюлетэняў, а потым іх зацікавіў кампутар. Крук адмовіўся яго аддаваць, і калі міліцыянты вырывалі сыстэмны блёк з гаспадаровых рук, той кінуў кампутар на падлогу і разьбіў.

Гэтыя дзеяньні Івана Крука суд прызнаў гвалтам у дачыненьні да міліцыянтаў.

Напярэдадні прэзыдэнцкіх выбараў Іван Крук зьбіраў подпісы за Аляксандра Мілінкевіча й Аляксандра Казуліна. Вынесены яму прысуд ён лічыць палітычна матываваным.
XS
SM
MD
LG