Лінкі ўнівэрсальнага доступу

Прэзыдэнт Вэнэсуэлы У.Чавэс наведае Беларусь


Радыё Свабода 23-26 ліпеня чакаецца візыт ў Беларусь прэзыдэнта Вэнэсуэлы Уга Чавэса. Пра гэта паведаміў пасол Вэнэсуэлы на Кубе, брат вэнэсуэльскага прэзыдэнта Адан Чавэс, які сёньня наведаў Беларусь.

Падчас перамоваў зь беларускімі афіцыйнымі прадстаўнікамі Адан Чавэс заявіў: “У нас ёсьць агульны вораг, які імкнецца перашкаджаць у дасягненьні нашых мэтаў, мы павінны аб’яднацца, каб супрацьстаяць дамінаваньню адной дзяржавы ў сьвеце”.

Ён падкрэсьліў, што “палітыка Вэнэсуэлы скіравана на тое, каб аб’яднаць высілкі міжнароднай супольнасьць супраць ціску, які робяць Злучаныя Штаты Амэрыкі”. Старшыня міжнароднай камісіі Савету Рэспублікі Мікалай Чаргінец у размове з вэнэсуэльскім госьцем заявіў: “Наша і Ваша краіна робяцца аб’ектамі ціску з боку ЗША, і гэты чыньнік дыктуе неабходнасьць каардынацыі нашых дзеяньняў”.

Злучаныя Штаты рэзка крытыкуюць прэзыдэнта Чавэса за парушэньні правоў чалавека і дзеяньні, якія пагражаюць бясьпецы ў рэгіёне. У лютым сёлета прэзыдэнт Чавэс прапанаваў вынесьці на рэфэрэндум пытаньне аб працягу сваіх прэзыдэнцкіх паўнамоцтваў да 2013 году. Паводле Чавэса, акрамя яго, няма ніводнага кандыдата на прэзыдэнцкую пасаду.
XS
SM
MD
LG