Лінкі ўнівэрсальнага доступу

logo-print

Нацыянальны камітэт дамагаецца рэфармаваньня судова-прававой сыстэмы


Радыё Свабода У рэгіёнах дэмакратычныя сілы прэзэнтуюць праграму рэфармаваньня судова-прававой сыстэмы. Кампанія скіраваная на шырокае інфармаваньне судзьдзяў пра зьмены ў сфэры права, якіх дамагаецца беларуская апазыцыя.

Праводзіць кампанію Нацыянальны камітэт аб’яднаных дэмакратычных сілаў. Яго экспэрты падрыхтавалі адмысловую брашуру “Судова-прававая рэформа. Беларусь: погляд у будучыню”. Як паведаміў Радыё Свабода старшыня Камітэту Анатоль Лябедзька, са зьместам выданьня вырашана азнаёміць, у прыватнасьці, цяперашніх судзьдзяў:

(Лябедзька: ) “На першым этапе, калі яшчэ не было розгаласу і калі гэтая праца праводзілася ў закрытым фармаце, то не было абсалютна ніякіх праблем і перашкодаў. Нашы людзі прыходзілі ў суд і тым, хто там працуе, перадавалі гэтыя брашуры, і была вялікая цікавасьць. Такой цікавасьці ня можа ня быць. Таму што там прапанавана альтэрнатыўнае бачаньне, якой павінна быць судовая сыстэма. Потым, відаць, пайшоў нейкі цыркуляр, нейкая ўказіўка ў суды і ў шэрагу месцаў у нас узьніклі праблемы”.

Так, у Берасьці, паводле зьвестак Нацыянальнага камітэту, за распаўсюд брашуры быў затрыманы старшыня Берасьцейскай абласной арганізацыі Аб’яднанай грамадзянскай партыі Сьцяпан Навасяльчан. У Клецку меў праблемы мясцовы актывіст дэмакратычнага руху Сяргей Панамароў:

(Панамароў: ) “Я раздаў брашуру пайменна ўсім нашым судзьдзям. Пракурору занёс асабіста. Усім патлумачыў, што так як я прайшоў восем судоў за восень і зіму, то маю права прапанаваць працу Нацыянальнага камітэту: ці патрэбна судовая рэфрма? На наступны дзень пачаліся тэлефанаваньні да мяне намесьніка начальніка Клецкага РАУС”.

Што думаюць пра брашуру Нацыянальнага камітэту ў Міністэрстве юстыцыі, якому падпарадкавана судовая сыстэма? Ці знаёмыя тут з фактамі супрацьдзеяньня распаўсюду праграмнага дакумэнта апазыцыі ў судова-прававой сфэры? З такімі пытаньнямі я зьвярнуўся да афіцыйнай прадстаўніцы Мінюсту Тацяны Бондар:

(Бондар: ) “Па гэтым пытаньні я не маю ніякай інфармацыі: дзе і што было ці не. Таму не магу нічога сказаць на гэты конт”.

Між тым, паводле Нацыянальнага камітэту, брашуру атрымалі шмат судзьдзяў. Напрыклад, на Гарадзеншчыне, дзе дзейнасьць судоў выклікае асаблівую занепакоенасьць прадстаўнікоў дэмакратычных сіл. Як вядома, менавіта тут за палітычную дзейнасьць прадстаўнікі Фэміды накіравалі ў свой час за краты журналістаў Міколу Маркевіча і Паўла Мажэйку, прадпрымальнікаў Валеры Леванеўскага і Аляксандра Васільева. Вось што паведаміў пра кампанію ў гэтым рэгіёне старшыня абласной арганізацыі Аб’яднанай грамадзянскай партыі Юры Істомін:

(Істомін: ) “Судовая ўлада павінна быць незалежнай. Гэта па-першае. Па-другое, патрэбна рэфармаваньне крымінальнага заканадаўства, таму што крымінальныя справы робяцца ад імя дзяржавы”.
XS
SM
MD
LG