Лінкі ўнівэрсальнага доступу

Візы ў Латвію бясплатнымі ня сталі


Радыё Свабода Ня спраўдзіліся паведамленьні некаторых мэдыяў пра тое, што ад 1 чэрвеня візы ў Латвію для грамадзянаў Беларусі стануць бясплатнымі. Першы сакратар амбасады Латвіі ў Беларусі Дзідра Ліепіня паведаміла, што сёньня консульска-візавая служба працуе ў звычайным парадку.

(Ліепіня: ) “Да нас сёньня, як звычайна, прыходзяць людзі й аплачваюць кошт візаў, атрымліваюць іх. Людзей больш, чым учора”.

На сёньняшні дзень аднаразовая віза ў Латвію для грамадзянаў Беларусі па-ранейшаму каштуе 35 эўра, шматразовая — 70.

Як паведамляе прэсавая служба кабінэту міністраў Латвіі, пытаньне пра выдачу бясплатных візаў грамадзянам Беларусі будзе, праўдападобна, разглядацца 6 чэрвеня.

Ініцыятыва зрабіць бясплатныя візы для жыхароў Беларусі зыходзіць ад Эўрапейскага парлямэнту. Яшчэ летась ягоныя дэпутаты заклікалі краіны Эўразьвязу пайсьці на такі крок, каб спрасьціць беларусам перамяшчэньне па Эўропе.
XS
SM
MD
LG