Лінкі ўнівэрсальнага доступу

Актывісты “Маладога фронту” пачалі бестэрміновую галадоўку


Любоў Лунёва, Менск Чатыры актывісты незарэгістраванай арганізацыі “Малады фронт” з Салігорску пачалі бестэрміновую галадоўку з патрабаваньнем спыніць рэпрэсіі супраць моладзевых актывістаў. Маладафронтаўцы разьлічваюць, што да галадоўкі далучацца іхныя сябры зь іншых рэгіёнаў краіны.

Максім Сяменчык, Мікола Пацкевіч і браты Шыла, Іван і Ільля, а 14-й гадзіне 29 траўня пачалі галадоўку. Іван і Ільля непаўналетнія. Яны вучацца ў 4-й сярэдняй школе ў Салігорску. Івану 15 гадоў, а Ільлю —13. Хлопцы патлумачылі, што галадоўку пачалі дзеля таго, каб зьвярнуць увагу грамадзкасьці на сытуацыю, у якой апынуліся апазыцыйныя актывісты ня толькі з “Маладога фронту”.

Чатырох сяброў незарэгістраванай арганізацыі “Партнэрства” Міколу Астрэйку, Цімафея Дранчука, Эніру Браніцкую й Аляксандра Шалайку дагэтуль трымаюць у сьледчым ізалятары КДБ. Маладафронтаўцам давялося некалькі разоў адбываць арышты ў турме на Акрэсьціна. Артура Фінькевіча, Зьмітра Касьпяровіча й Сяргея Ляшкевіча трымалі пад вартай у сьледчым ізалятары. Суд пазбавіў волі Зьмітра Касьпяровіча за тое, што той намагаўся сарваць дзяржаны сьцяг на будынку Менгарвыканкаму, Сяргея Ляшкевіча суд пакараў арыштам на 5 месяцаў — нібыта за дзеяньні, якія пагражаюць інтарэсам грамадзянаў, а Артура Фінькевіча за графіці пакаралі абмежаваньнем волі на 2 гады. На “хіміі” адбывае пакараньне Павал Севярынец за арганізацыю вулічнай дэманстрацыі супраць фальсыфікацыі вынікаў выбараў і рэфэрэндуму 2004 году. Актывістаў “Маладога фронту” выклікаюць на допыты ў КДБ і пракуратуру. Распачалі некалькі крымінальных справаў.

Непаўналетні Іван Шыла паведаміў Радыё Свабода, што ня будзе есьці, пакуль грамадзкасьць не запатрабуе ад уладаў спыніць перасьлед апазыцыйнай моладзі.

(Шыла: ) “Мы пайшлі на такія крытычныя меры, каб зьвярнуць увагу грамадзтва на крымінальны перасьлед лідэраў руху. Наагул, мы патрабуем спыніць перасьлед актывістаў іншых моладзевых рухаў. Заклікаем грамадзтва сыстэматызаваць працу, аб’яднацца і распачаць рух, які будзе дамагацца свабоды”.

18-гадовы Максім Сяменчык дадаў:

(Сяменчык: ) “Ад пачатку выбарчай кампаніі ўвесь час пасадкі й выхады, пасадкі й выхады…Чалавек толькі выйдзе на волю, яго зноў садзяць. У такіх умовах мы пачынаем галадоўку. Патрабуем спыніць перасьлед моладзі”.

Сябры незарэгістраванай арганізацыі “Малады фронт” разьлічваюць, што да галадоўкі салігорцаў далучацца маладафронтаўцы зь іншых рэгіёнаў.
XS
SM
MD
LG