Лінкі ўнівэрсальнага доступу

Пачаўся суд над адвакатам А.Казуліна (абноўлены)


Радыё Свабода У Маскоўскім раённым судзе пачаўся разгляд адміністрацыйнай справы адваката Ігара Рынкевіча, які абараняе былога кандыдата на прэзыдэнта Аляксандра Казуліна.

Адміністрацыйную справу адваката Казуліна Ігара Рынкевіча разглядае судзьдзя Маскоўскага раённага суду Надзея Равуцкая, імя якой пасьля прэзыдэнцкіх выбараў унесена ў сьпіс “неўязных” у краіны Эўразьвязу. Ігар Рынкевіч абвінавачваецца ў дробным хуліганстве падчас падзеяў 2 сакавіка. Нагадаю, у той дзень быў зьбіты й затрыманы міліцыяй кандыдат на прэзыдэнта Аляксандар Казулін, які спрабаваў зарэгістравацца ўдзельнікам Усебеларускага сходу. Да Казуліна, якога часова ўтрымлівалі ў Кастрычніцкім райаддзеле міліцыі, выклікалі адваката Ігара Рынкевіча.

Побач з Кастрычніцкім райаддзелам міліцыі стаялі некалькі дзясяткаў людзей, якія патрабавалі вызваліць Казуліна. Некаторых зь іх пачалі затрымліваць міліцыянты, затрымалі й адваката Ігара Рынкевіча. Міліцыянты ў пратаколах напісалі, што Рынкевіч лаяўся ды не падпарадкоўваўся іхным патрабаваньням. Ігар Рынкевіч гэта абвяргае.

Сёньня ў судзе адвакат назваў тых, хто мог бы засьведчыць яго невінаватасьць. Сярод іх і Ўладзімер Казулін, якога затрымалі разам зь Ігарам Рынкевічам. Уладзімер Казулін мае свой погляд на прычыны, паводле якіх перасьледуюць адваката ягонага брата Аляксандра Казуліна.

(Уладзімер Казулін: ) “Мэта, як я разумею, неяк яго пакараць — ці то штрафам, ці суткамі, каб потым адхіліць ад абароны Аляксандра Казуліна, а, магчыма, і ўвогуле выгнаць з калегіі адвакатаў. Бо навошта тады трэба было гэта ўсё пачынаць?”

Уладзімер Казулін паведаміў, што побач з райаддзелам міліцыі затрымалі 13 чалавек. Двух зьбітых журналістаў выпусьцілі першымі, на астатніх склалі пратаколы. Але суду над імі, акрамя Рынкевіча, гэтак і не адбылося — судзьдзі прызналі, што пратаколы былі складзеныя з парушэньнямі.

Сам Ігар Рынкевіч ад камэнтароў пакуль устрымліваецца. Судзьдзя Надзея Равуцкая задаволіла сёньня большасьць ягоных хадайніцтваў, у тым ліку і просьбу, каб яго абараняў калега зь Менскай абласной калегіі адвакатаў. Працэс над Ігарам Рынкевічам адновіцца заўтра, 27 красавіка. Максымальнае пакараньне, якое пагражае адвакату Казуліна, — 15 сутак адміністрацыйнага арышту.
XS
SM
MD
LG