Лінкі ўнівэрсальнага доступу

logo-print

Магілёўскі актывіст З.Салаўёў пакараны 10 суткамі адміністрацыйнага арышту


Радыё Свабода, Магілёў Намесьнік магілёўскай гарадзкой суполкі партыі БНФ, былы вязень турмы на Акрэсьціна Зьміцер Салаўёў быў затрыманы супрацоўнікамі міліцыі ў пятніцу. Паводле пратаколу, ён у банкаўскім цэнтры нецэнзурна лаяўся, размахваў рукамі і не падпарадкоўваўся заўвагам міліцыянтаў. Двое сутак Зьміцер Салаўёў правёў у ізалятары часовага ўтрыманьня на вул. Крупскай у Магілёве. На знак пратэсту ён абвясьціў галадоўку.

Паводле Ўладзімера Краўчанкі, абаронцы інтарэсаў сп. Салаўёва, судзьдзя Андрэй Юрчанка пры вынясеньні прысуду абапіраўся толькі на сьведчаньні міліцыянтаў. Ён адмовіўся выклікаць супрацоўнікаў банка і сувязістаў, якія былі сьведкамі затрыманьня.

Міліцыянты, сяржант Таранаў ды старшы прапаршчык Рыбакоў, у сваіх паказаньнях паўтарылі факты, выкладзеныя ў пратаколе: затрыманы нецэнзурна лаяўся ды абражаў іх гонар. Сп. Юрчанка вынес прысуд без абвяшчэньня перапынку.

У судзе Зьміцер Салаўёў заявіў, што будзе працягваць галадоўку пратэсту.
XS
SM
MD
LG