Лінкі ўнівэрсальнага доступу

Сёньня павінен быць сфармаваны новы ўрад Беларусі


Уладзімер Глод, Менск Панядзелак, 24 красавіка, як дату канчатковага вызначэньня структуры і складу новага ўраду назваў намесьнік міністра эканомікі Андрэй Тур на эканамічным форуме, які праходзіў напрыканцы мінулага тыдня ў Менску.

Калі прагноз Андрэя Тура збудзецца, дык тады можна цьвердзіць, што фармаваньне ўраду скончыцца з другой спробы. У мінулую сераду кандыдатаў на адказныя пасады сабраў у сябе Аляксандар Лукашэнка. Але тады ён не прыняў канчатковага рашэньня і запатрабаваў ад Сяргея Сідорскага, каб той цягам некалькіх дзён дапрацаваў структуру кабінэта і вызначыўся з усімі прэтэндэнтамі на высокія пасады.

(Лукашэнка: ) "Ад гэтага часу прэзыдэнт ня будзе больш бегчы наперадзе ўраду альбо любога іншага чыноўніка. Той, хто павінны ісьці на амбразуру першым, той на яе і пойдзе. Хто не пойдзе, той, калі ласка, сыходзьце. Хопіць хавацца за сьпіну кіраўніка дзяржавы".

Вядомы беларускі эканаміст Леанід Злотнікаў упэўнены, што нейкія нязначныя зьмены ў структуры ўраду адбудуцца, так як гэта рабілася і раней. Але сур’ёзных зьменаў у эканамічным курсе Беларусі бліжэйшым часам ня будзе. Нават, калі б урад гэтага і пажадаў. Спадар Злотнікаў лічыць, што курс вызначае кіраўнік дзяржавы, а на долю міністраў застаюцца чыста тэхнічныя, выканальніцкія функцыі.

Эканаміст прагназуе, што ў новай пяцігодцы вызначальнымі для ўраду Сяргея Сідорскага будуць два фактары. Першы, ці зможа ён залучыць дастатковую колькасьць інвэстыцыяў.

(Злотнікаў: ) "У мінулым дзесяцігодзьдзі эканамічны рост адбываўся за кошт, па-першае, выкарыстаньня рэзэрваў нявыкарыстаных раней магутнасьцяў, а па-другое, за кошт зношваньня асноўных фондаў. І на гэта не патрабавалася багата інвэстыцыяў. Цяпер жа, каб павялічыць ВУП, а на гэтай аснове і заробкі, патрэбныя інвэстыцыі. Ёсьць такія разьлікі: каб павялічыць ВУП на 1 адзінку, трэба павялічыць інвэстыцыі на 1,4—1,6 адзінкі. Ці будуць яны? Вось гэта самае цяжкое пытаньне для ўраду".

Другі – магчымае падвышэньне цэнаў на газ для Беларусі. Спадзяваньні прэм’ера Сідорскага на тое, што расейскі "Газпром" павінен прытрымлівацца роўных умоваў для гаспадарчых суб''ектаў Беларусі і Расеі, на думку Леаніда Злотнікава, могуць прывесьці да вельмі небясьпечных для Беларусі рэчаў.

(Злотнікаў: ) "Калі нашы патрабуюць роўных умоваў для суб''ектаў гаспадараньня, дык і расейцы запатрабуюць роўных умоваў для сваіх суб''ектаў на тэрыторыі Беларусі. А гэта вельмі небясьпечна. Да гэтага часу Беларусь штучна стрымлівала патокі расейскіх тавараў і паслугаў на сваю тэрыторыю. Але калі гэтага не стане, дык адразу высьветліцца, што беларуская і расейская эканомікі не ўзаемадапаўняльныя, а канкурэнтныя. Хутка "ляжа" беларуская лёгкая прамысловасьць, хлынуць расейскія будаўнічыя матэрыялы, прадукты ды іншае. Тут Беларусь больш страчвае, чым знаходзіць".
XS
SM
MD
LG