Лінкі ўнівэрсальнага доступу

Хваля рэпрэсій супраць актывістаў апазыцыі не спыняецца


Радыё Свабода Студэнтаў, выключаюць з вучобы, нягледзячы на абяцаньні міністра адукацыі Аляксандра Радзькова пакінуць усіх затрыманых навучэнцаў у часе выбарчай кампаніі у навучальных установах. Працягваюцца звальненьні, суды і аршыты ўдзельнікаў вулічных акцый.

Студэнты зьвяртаюцца ў грамадзкі камітэт падтрымкі рэпрэсаваных. Кожны распавядае сваю гісторыю. Згодна з загадам адміністрацый навучальных установаў, большасьць студэнтаў выключылі з вучобы з фармулёўкай “за сыстэматычныя пропускі заняткаў”. Пад кола рэпрэсій трапілі студэнты як дзяржаўных, так і недзяржаўных установаў. Марыю Сьвянціцкую выключылі з Акадэміі ўнутраных справаў, а Тамару Рудзько з Інстытуту парлямэнтарызму і прадпрымальніцкай дзейнасьці.

Працу ў сталічных унівэрсытэтах страцілі каля дзесятка выкладчыкаў. Некалькі студэнтаў ВНУ распавялі, што іх выклікалі ў дэканат і пагражалі праблемамі ў часе сэсіі. Студэнты, якія вучацца на апошнім курсе, паўсталі перад праблемай разьмеркаваньня. Менчукам пагражаюць накіраваньнем у Чарнобыльскую зону. Натальля Лініцкая вучыцца на пятым курсе гістфака БДУ. Яна была затрыманая ў часе ліквідацыі намётавага лягеру і адседзела 10 сутак арышту. Натальля паведаміла, што ў дэканаце ёй казалі аб тым, што цяпер яна не атрымае разьмеркаваньня на працу ў менскую школу, а паедзе ў сельскую мясцовасьць.

Намесьнік дэкана Аляксандр Каханоўскі так патлумачыў гэта Радыё Свабода:

(Каханоўскі:) “Ёй было прапанавана: “Знайдзіце сабе месца ў дзяржаўнай установе па спецыяльнасьці і мы вас туды разьмяркуем.”Гэта тычыцца менчукоў. У менску месцаў шмат няма. Калі вы знойдзеце сабе месца, прынясеце заяўку, калі ласка. Але яна пра сябе не паклапацілася”.

Ён дадаў, што некаторыя студэнты, удзельнічая ў вулічных акцыях, спрабуюць зарабіць сабе палітычныя дывідэнты. Калі некаторых студэнтаў пакуль не адлічылі з вучобы, то ўжо звольнілі з працы, дзе яны працавалі пасьля заняткаў. Сяргея Карбановіча пасьля таго, як ён выйшаў з турмы на Акрэсьціна, прымусілі напісаць заяву на звальненьне “па ўласнаму жаданьню”. Ён працаваў бармэнам ў рэстарацыі “Журавінка”.

Намесьнік дырэктара рэстарацыі Аляксандр Завадзкі паведаміў “Свабодзе”, што Вадзім яго не задавальняе як супрацоўнік і дадаў:

(Завадзкі:) “Я папросту вельмі прыстойны чалавек, шчыра вам скажу. Ён прыйшоў пасьля 10 сутак… Гэта ягоная асабістая справа стаяць, ці не стаяць. Могуць быць непрыемнасьці.”

Супрацоўнікі міліцыі шукаюць затрыманых 2 сакавіка актывістаў штабу Аляксандра Казуліна. Гэта тычыцца тых, якіх судзілі завочна, бо яны ў той час адбывалі арышты за ўдзел у іншых акцыях апазыцыі. Супраць Мікіты Сасіма і Міхася Панкова распачалі крымінальныя справы за ўхіленьне ад службы ў войску. Распачата больш за дзесятак крымінальных справаў супраць актывістаў моладзевых незарэгістраваных арганізацый. Супрацоўнікі КДБ вядуць допыты і чыняць ператрусы ў Жодзіне, Баранавічах, Менску, Магілёве, Бабруйску і ў іншых рэгіёнах. Нягледзячы на ўсё гэта, моладзь даволі актыўна ўдзельнічае ў вулічных вясновых акцыях.
XS
SM
MD
LG