Іх сустракалі кветкамі і воклічамі "Слава героям!"

Са сьценаў Жодзінскага ізалятара выходзяць 84 чалавекі, іх сустракае каля трохсот чалавек, сярод іх шмат прадстаўнікоў прафсаюзаў, прадпрымальнікаў. Прадпрымальнікі забясьпечылі транспарт , каб развесьці дадому вызваленых з Жодзіна, а таксама з турмы на Акрэсьціна. Зараз выходзяць на волю людзі, якяі трымалі галадоўку, сярод іх Дзяніс Буйніцкі з Бабруйску. Хлопцы кажуць, што адчуваюць сябе больш-меньш нармальна. Выпусьцілі журналіста Вадзіма Казначэева. Жонкі, сваякі і прысутныя сустракаюць вызваленых воклічамі "Жыве Беларусь!", "Слава героям!"

Сёньня ж выйдуць на волю зьняволеныя на Акрэсьціна. Там у іх падтрымку нават вывесілі плякат-расьцяжку. Павінны выйсьці на волю і дзесяць дзяўчат з ізалятару Менскага раёну. Побач са мной знаходзіцца Ігар Марыніч, ён прыехаў, каб аказаць патрэбную дапамогу транспартам вызваленым і іх сваякам.

(Марыніч): Я лічу, што нашаму грамадзтву ў гэты час вельмі патрэбная салідарнасьць. Мой бацька ўвесь гэты час знаходзіцца за кратамі. Тое ,як трымаліся гэтыя хлопцы і дзяўчаты - вельмі добры прыклад для ўсяго нашага грамадзтва.

Палітвязьні выходзяць па двое, па трое, і паколькі гэтая працэдура зацягваецца , яна расьцягнецца, відаць, да шостай раніцы. Людзі трымаюць у руках кветкі. Адна маці з Жодзіна сустракала тут свайго сына-студэнта. Яна кажа, што на працы ёй усе выказвалі падтрымку і што яна ганарыцца сваім сынам.