Лінкі ўнівэрсальнага доступу

Дзесяць сутак бяз права на інфармацыю


Радыё Свабода Сёньня на волю са шчучынскага спэцпрымальніка выйшаў Васіль Бязьмен, актывіст ініцыятыўнай групы Мілінкевіча. Яго асудзілі на 10 сутак па абвінавачаньні ў нецэнзурнай лаянцы ў грамадзкім месцы. Усе 10 дзён Васіль ня ведаў, што адбываецца ў краіне.

Васіль Бязьмен працуе лекарам у шчучынскім шпіталі, і першае, што ён сказаў, калі выйшаў на волю, што ніколі нецэнзурна ня лаецца. Ён сядзеў у камэры, дзе знаходзіліся ад 3 да 6 чалавек. Кармілі двойчы на дзень. Ежа задавальняла, але ў камэры было халодна. Хаця супрацоўнікі міліцыі, паводле Васіля Бязьмена, ставіліся да яго нармалёва. Кажа Васіль Бязьмен:

(Бязьмен: ) “Кормяць два разы на дзень, ежа прыстойная. Іншая справа, што ўмовы ўтрыманьня антысанітарныя. Яшчэ даволі халодна і жорстка”.

Але самым складаным для Васіля Бязьмена за гэтыя 10 сутак было ня ведаць пра тое, што адбываецца ў краіне. Да яго падсаджвалі новых арыштантаў, але ніхто зь іх ня мог расказаць пра навіны зь Менску. Кажа Васіль Бязьмен:

(Бязьмен: ) “Інфармацыі не было ніякай. Тыя людзі, якія прыходзілі да мяне ў камэру, ім было абсалютна да лямпачкі, што адбываецца ў краіне. Яны не цікавяцца палітыкай, у іх зусім іншыя інтарэсы ў жыцьці”.

У Васіля Бязьмена двойчы рабілі ператрус: на працы і ў кватэры. Яго прывезьлі на размову ў міліцыю, і там жа склалі пратакол. Сьледчы заявіў, што спадар Бязьмен выйшаў з машыны і пачаў лаяцца.

* * * У Шчучынскім спэцпрымальніку застаецца за кратамі Сяргей Ляшкевіч, кіраўнік ініцыятыўнай групы Аляксандра Мілінкевіча. Яму не прад’явілі абвінавачаньняў, але падазраюць па артыкуле 293 Крымінальнага кодэксу — навучаньне ці іншая падрыхтоўка асобаў да ўдзелу ў масавых беспарадках.
XS
SM
MD
LG