Лінкі ўнівэрсальнага доступу

Апытаньне ўдзельнікаў сьвяткаваньня Дня Волі


Радыё Свабода, Менск Зь якімі пачуцьцямі выйшлі сёньня людзі на сьвяткаваньне Дня Волі? Як яны ставяцца да апошніх падзеяў на Кастрычніцкай плошчы? Апытаньне Свабоды.

(Спадарыня: ) “Не магу сядзець дома. Надакучылі гэтая хлусьня й гэты абмежаваны, злосны чалавек”.

(Спадарыня: ) “Мы — ня быдла. Мы людзі”.

(Юнак: ) “Па ўсіх тэлеканалах мы ня бачым таго, што насамрэч. І людзі хочуць тут казаць, што яны думаюць”.

(Спадарыня: ) “Ніяк немагчыма прайсьці. Усё перакрыта, і адсякаюць народ. АМОН бярэ й адсякае кучкамі. Вось, бачыце, што яны робяць?! Ужо гоняць”.

(Спадар: ) “ Ужо адсякаюць, гоняць”.

(Спадарыня: ) “Няма сіл ўжо трываць гэта. Хочацца людзьмі звацца”.

(Карэспандэнт: ) "Як вы ставіцеся да падзеяў на Кастрычнцікай плошчы? Вы падтрымлівалі тых дэманстрантаў?"

(Спадарыня: ) “Гэтыя маладыя людзі — героі, і мы павінны імі ганарыцца”.

(Спадарыня: ) “Гэта дзеці, якія ўвойдуць у гісторыю Беларусі. Гэта нашы дзеці, якія зрабілі прарыў”.

(Спадарыня: ) “Падтрымлівала, кожны дзень хадзіла, ежу насіла й цёплую вопратку. Але я зьдзіўлена, чаму беларус супраць беларуса ідзе, спэцназ супраць людзей простых”.

(Спадар: ) “Улада ўжыла сілу там, дзе яе непатрэбна было ўжываць. Гэта татон-махуты, у горшай іх праяве, і татон-махуцкая ўлада, у горшай яе праяве. У савецкія часы татон-махутамі абзывалі рэжымы ў Лацінскай Амэрыцы. Цяпер гэты лацінаамэрыканскі рэжым кіруе на нашай тэрыторыі. Гэта вельмі прыкра”.

(Спадарыня: ) “Улады баяцца. Значыць, яны ведаюць, чаго баяцца”.

(Спадарыня: ) “За праўду, за свабоду, за справядлівасьць. Хочам убраць дыктатарства. Надакучыла нам ужо! Людзі паўсталі супраць яго. Няхай бы сышоў першым прэзыдэнтам. Яго народ ня хоча”.

(Спадарыня: ) “Надакучыла хлусьня: мярзотная, нахабная, бессаромная хлусьня. Дасталі!”

(Спадар: ) “Ціск на нас, на свабоду, дыктатура. Таму мы тут і знаходзімся разам з унукам”.

(Спадар: ) “Калі вы Радыё Свабода, то перадайце, каб не пускаць за мяжу ні судзьдзяў, ні шараговага міліцыянта — усе карныя органы. Прыкрыць ім… Каты, карацелі”.

(Маладзён: ) “Я зьбянтэжаны тым, што адбываецца ў гэтай краіне. Няма сілы больш трываць”.

(Спадар: ) “Гвалт нам не патрэбен”.
XS
SM
MD
LG