Лінкі ўнівэрсальнага доступу

Разгон на Кастрычніцкай плошчы Менску: як гэта было? (абноўлены)


Радыё Свабода Мінулай ноччу намётавы гарадок на Кастрычніцкай плошчы Менску разбурыў спэцназ. Cотні чалавек затрымалі й адвезьлі ў суды, акцыя пратэсту апазыцыі супраць несумленных выбараў спынена гвалтам.

Чацьвертая ноч у намётавым гарадку на Кастрычніцкай плошчы была неспакойная ад самага пачатку. А восьмай гадзіне вечара міліцыянты моцна зьбілі магілёўскага студэнта Міколу Ільіна, які вёз у лягер біятуалет. Лекары хуткай дапамогі канстатавалі чэрапна-мазгавую траўму. З дванаццатай да другой ночы на плошчы зьявіліся паўтара дзясятка п’яных маладзёнаў, якія правакавалі спрэчкі і бойкі, выгуквалі лёзунгі ў падтрымку Лукашэнкі ды Саюзу з Расеяй і лаянку на адрас апазыцыі. Двух зь іх, што пачалі ўжываць сілу супраць актывістаў апазыцыі і журналістаў, міліцыя забрала ў аўтобус, што стаяў за Палацам рэспублікі.

У 2.50 ля левага ўваходу ў Палац зьявілася міліцэйскае кіраўніцтва, намесьнік міністра ўнутраных справаў Віктар Філістовіч перад шэрагам афіцэраў даў апошнія распараджэньні, спытаўся па рацыі пра гатовасьць спэцаўтатэхнікі і а трэцяй гадзіне загадаў пачынаць апэрацыю.

Першым яе этапам было аддзяленьне двух дзясяткаў журналістаў ад дэманстрантаў. Усіх прадстаўнікоў прэсы вывелі за мяжу плошчы, мэтраў за пяцьдзясят ад намётаў. З боку цырку пад’ехалі восем вялікіх МАЗаў, прыстасаваных для перавозкі затрыманых, і аўтобусы са спэцназам.

Вялізныя машыны ачапілі лягер, людзі пачалі выгукваць: “Міліцыя з народам!”. Адна жанчына — верагодна, Валянціна Палевікова — зьвярнулася да міліцыянтаў з просьбай не чыніць гвалту, але міліцыя ўжо прыступіла да затрыманьняў, пачуліся енкі, плач, першых дэманстрантаў пацягнулі ў машыны. Пазьней спэцназ стаў ланцугамі, стварыўшы калідоры, па якіх дэманстрантаў калёнай павялі ў машыны. Адначасова пачалося разбурэньне намётаў, зрываньне транспарантаў і бел-чырвона-белых сьцягоў. Толькі пасьля гэтага прэсе дазволілі прыйсьці на месца падзеяў, убачыць гару харчоў, тэрмасаў, адзеньня. У двух мангалах яшчэ тлела вугольле, на якім дэманстранты гатавалі ваду для гарбаты. Прыблізна ў гэты час на плошчы зьявіўся Аляксандар Казулін з жонкай:

(Казулін: ) “Сярод затрыманых два мае родныя пляменьнікі, Казулін Сашка і Алёшка, яны былі тут да самага канца, цяпер яны патэлефанавалі мне, што едзе “бамбёж” і што іх павезьлі… Нэрвы ва ўлады не вытрымалі, вось і робяць гэта ноччу, каб як мага меней сьведкаў было”.

Спадар Казулін на Кастрычніцкай плошчы сустрэў намесьніка міністра ўнутраных справаў Віктара Філістовіча і сказаў яму:

(Казулін: ) “Магу вам сказаць, што гэта паказвае, што вы ня ўмееце весьці дыялёгу”.

(Філістовіч: ) “Добра, я вам сказаў, што рукі вам не пацісну”.

(Казулін: ) “Можна паціскаць, можна не паціскаць, але трэба спакойна працаваць, каб было ўсё ў парадку”.

(Філістовіч: ) “Спакойна працавалі”.

Даваць камэнтары прэсе спадар Філістовіч адмовіўся. А Аляксандар Казулін паехаў да спэцпрыёмніку на вуліцы Акрэсьціна. Пазьней там зьявіўся Аляксандар Мілінкевіч з жонкай, сын якой Ігар таксама быў сярод затрыманых. Пад сьценамі турмы два апазыцыйныя палітыкі правялі кароткія перамовы і, як сказаў спадар Казулін, дамовіліся пра супрацоўніцтва, нягледзячы на ранейшыя разыходжаньні.
XS
SM
MD
LG