Лінкі ўнівэрсальнага доступу

Як кандыдаты на прэзыдэнта глядзяць на праблему замежных інвэстыцыяў?


Радыё Свабода Трое канкурэнтаў Аляксандра Лукашэнкі кажуць пра тое, што такіх інвэстыцыяў Беларусі трэба больш. Паплечнікі дзейнага кіраўніка краіны агучваюць прынцып: менш – але больш мэтанакіравана.

Тэма залучэньня замежных інвэстыцыяў асобна закранутая ў эканамічнай праграме кандыдата Аляксандра Мілінкевіча. Са словаў распрацоўніка праграмы эканаміста Яраслава Раманчука, недахоп інвэстыцыяў у Беларусі відавочны.

(Раманчук: ) “Беларусь паводле індэксу гасьціннасьці да капіталу знаходзіцца на 131 месцы са 135 краінаў сьвету. Безумоўна, гэта сьведчыць пра крызыс даверу да нашай краіны. Тут рэцэпт вельмі просты: перш за ўсё трэба казаць пра тое, каб забясьпечыць правы ўласнасьці, трэба мець празрыстыя стасункі паміж уладамі й бізнэсам; трэба прынамсі ўдвая зьнізіць падаткі, правесьці дэбюракратызацыю; мы павінны зрабіць лібэралізацыю эканомікі, а не заганяць яе ў ціскі цэнавага рэгуляваньня, штрафаў і ўсяго таго, што робіць наш дзелавы клімат непрыдатным для сур’ёзных інвэстыцыяў – і ўнутраных, і вонкавых”.

Прэсавы сакратар выбарчага штабу кандыдата Аляксандра Лукашэнкі Дзьмітры Косьцін нагадвае: дзейны кіраўнік краіны даволі шмат казаў пра сваё стаўленьне да праблемы замежных інвэстыцыяў. Неаднаразова на гэтую ж тэму выказваліся й прадстаўнікі беларускага ўраду, гаворыць спадар Косьцін.

(Косьцін: ) “Інвэстыцыі Беларусі патрэбныя толькі ў тым аб’ёме, які яна можа скарыстаць. Менш – але больш мэтанакіравана, у канкрэтныя праекты. Бо за кожную інвэстыцыю ў свой час даводзіцца расплачвацца: маёмасьцю, ці крэдытамі, ці працэнтамі. Трэба думаць пра тое, што будзе заўтра”.

Кіраўнік выбарчага штабу кандыдата Аляксандра Казуліна Мечыслаў Грыб з такой пазыцыяй нязгодны.

(Грыб: ) “Трэба столькі, колькі можам спажыць – так жывуць дзікія зьверы. Драпежныя зьверы ў лесе чыняць рабункі, але яны забіваюць толькі тое, што ім трэба для таго, каб пражыць. А людзі павінны меркаваць ня толькі пра сёньняшні дзень, але й пра заўтрашні, і пазаўтрашні. У людзей павінен быць іншы падыход”.

Кандыдат Сяргей Гайдукевіч сьцьвярджае, што беларускі ўрад дагэтуль не ацаніў рэальную патрэбу краіны ў замежных інвэстыцыях, гэтай праблемай папросту як сьлед не займаюцца, кажа ён.

(Гайдукевіч: ) “У нас зношанасьць фондаў шмат на якіх прадпрыемствах далёка за 70-80 адсоткаў. Таму я лічу, што інвэстыцыяў недастаткова, павінны выкарыстоўвацца ня толькі ўнутраныя інвэстыцыі, якія ёсьць у дзяржаве. Прадпрыемствы павінны быць прывабнымі для прыватных інвэстыцыяў, бо адміністрацыйным рэсурсам тут нічога ня вырашыш”.

Спадар Гайдукевіч кажа пра неабходнасьць даць інвэстарам гарантыі, каб Беларусь стала для іх прывабнай.
XS
SM
MD
LG