Лінкі ўнівэрсальнага доступу

БТ абвінаваціла апазыцыю ў намеры сфальшаваць вынікі экзыт-полаў


Радыё Свабода Увечары 26 лютага Беларускае тэлебачаньне паказала сюжэт, у якім супрацоўнікі КДБ дэманстравалі сфальшаваныя пратаколы апытаньняў (так званых экзыт-полаў), якія павінны праводзіцца на выхадзе з участкаў у дзень выбараў 19 сакавіка. Апазыцыя са спасылкай на літоўскае аддзяленьне амэрыканскага сацыялягічнага Інстытуту Гэлапа нібыта загадзя падрыхтавала пратаколы з фальшывымі лічбамі.

26 лютага у праграме “Ў цэнтры ўвагі” на БТ былі паказаныя сфальшаваныя пратаколы апытаньняў, нібыта знойдзеныя ў офісе незарэгістраванай грамадзянскай ініцыятывы “Партнэрства”. Супрацоўнікі Камітэту дзяржбясьпекі дэманстравалі “вынікі экзыт-полу”, якія нібыта былі падрыхтаваны літоўскім аддзяленьнем амэрыканскага сацыялягічнага Інстытуту Гэлапа. На пратаколах апытаньня выбарцаў была прастаўленая дата — 19 сакавіка. Паводле прыведзенага тэксту, кандыдат ад аб’яднанай апазыцыі Аляксандар Мілінкевіч набраў 53,7% галасоў, Аляксандар Лукашэнка — 41,3%, старшыня сацыял-дэмакратычнай партыі “Грамада” Аляксандар Казулін — 3,8%, а лідэр лібэральна-дэмакратычнай партыі Сяргей Гайдукевіч — 1,2%.

У камэнтары да сюжэту гучалі словы пра тое, што апазыцыя “папярэдне рыхтуецца да масавай фальсыфікацыі вынікаў галасаваньня”. А кіраўнік Цэнтру інфармацыі і грамадзкіх сувязяў КДБ Валеры Надтачаеў сьцьвярджаў, што фінансуе дзейнасьць ініцыятывы “Партнэрства”, нібыта, амэрыканскі Нацыянальны дэмакратычны інстытут праз сваё кіеўскае аддзяленьне.

Дырэктарка літоўскага аддзяленьня Інстытуту Гэлапа Раса Алішаўскене называе гэты сюжэт па беларускім тэлебачаньні фальшыўкай:

(Алішаўскене: ) “Гэта сапраўдная фальшыўка. Быў паказаны нейкі блянк, але ён ня наш. Называлі нашае імя, але з намі гэта нічога агульнага ня мае. Там ужо стаяць нейкія даты, я так разумею, што бачыла па тэлебачаньні, дня выбараў. Гэтая фальшыўка ня мае да нас ніякага дачыненьня”.

Раса Алішаўскене таксама сказала, што ўстанова, якой яна кіруе, не зьбіраецца праводзіць экзыт-полаў падчас прэзыдэнцкіх выбараў у Беларусі. Літоўскае аддзяленьне Інстытуту Гэлапа ўжо накіравала ў СМІ ў гэтай справе адмысловы прэсавы рэліз.

А дырэктар ліквідаванага ў Беларусі і зарэгістраванага ў Літве Незалежнага інстытуту сацыяльна-эканамічных і палітычных дасьледаваньняў прафэсар Алег Манаеў лічыць гэты сюжэт правакацыяй:

(Манаеў: ) “Я лічу, што гэта правакацыя. Я вельмі добра ведаю гэтых людзей, гэтую інстытуцыю. Мы супрацоўнічалі зь імі некалькі гадоў. Гэта вельмі паважаная і прафэсійная арганізацыя. Таму папярэдне падрыхтаваць гэтыя пратаколы для іх абсалютна немагчыма. Таму я абсалютна ўпэўнены, што гэта чыстай вады правакацыя з боку нейкіх беларускіх спэцслужбаў”.

21 лютага супрацоўнікі КДБ затрымалі ў Менску чатырох актывістаў ініцыятывы “Партнэрства” — Міколу Астрэйку, Эніру Браніцкую, Аляксандра Шалайку і Цімоха Дранчука. Усе яны знаходзяцца ў сьледчым ізалятары КДБ. Іх падазраюць у кіраваньні арганізацыяй, якая парушае правы грамадзянаў. Гэты артыкул Крымінальнага кодэксу прадугледжвае пакараньне ад шасьці месяцаў да трох гадоў пазбаўленьня волі. Справу перадалі ў пракуратуру Менску, мерай стрыманьня абраны арышт.

Гл.таксама • БТ абвінаваціла апазыцыю ў намеры сфальшаваць вынікі экзыт-полаў
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG