Лінкі ўнівэрсальнага доступу

Чаму няма гатоўкі ў некаторых менскіх банкаматах?


Радыё Свабода У Менску ў некаторых банкаматах апошнімі днямі немагчыма было атрымаць грошы – аўтамат не выдаваў гатоўку, а толькі даваў магчымасьць заплаціць за камунальныя паслугі ці за сотавы тэлефон. Ці не спрабавалі банкі такім чынам прымусіць сваіх кліентаў разьлічвацца ў крамах па картцы, а не гатоўкай?

Праблемы з атрыманьнем наяўных грошай сапраўды могуць раз-пораз узьнікаць, але ніякіх абмежаваньняў банкі ня ўводзяць, запэўнівае дырэктар дэпартамэнту плястыкавых картак “Белінвэстбанку” Юры Чарняўскі. Нічога надзвычайнага ў гэтым няма.

(Чарняўскі:) “Калі ў банкамаце заканчваюцца наяўныя грошы ў касэтах, альбо здараецца яшчэ нейкая заштатная сытуацыя, па прычыне якой немагчыма выдаць наяўныя грошы, у гэтым выпадку, калі астатнія вузлы банкамату працуюць, ён працягвае абслугоўваць кліента, але па апэрацыях безнаяўнай аплаты”.

Але ж зьняць грошы з банкамату “Белінвэстбанку” бывае няпроста, нават калі агрэгат працуе спраўна. Вядомы пункт – банкамат ля “Дому друку” ў Менску, што праз дарогу ад Акадэміі мастацтваў. Тут абарачэньне грошай перавышае мільярд рублёў на месяц. І практычна штодня, у любы час тут можна ўбачыць немалыя чэргі. У абед аўторка тут стаяла чалавек пятнаццаць. Адна з жанчынаў у чарзе скардзілася:

(Спадарыня: ) “Вось бачыце, якія чэргі. Іншы раз прыйдзеш дык увогуле грошай няма. Трэба ехаць 35-ым некуды. Мы будзем больш за гадзіну стаяць. У кожным разе, я мяркую, тэхналёгія гэтая яшчэ недасканалая – вось так пхнулі людзей дый стойце ў чарзе”.

Людзі ідуць толькі да банкаматаў сваіх банкаў, бо іначай трэба плаціць камісію за зьняцьцё гатоўкі. Амаль палова стаіць у чэргах толькі для таго, каб праверыць свой рахунак: дазваніцца да банку па тэлефоне складана, праверыць свой рахунак празь інтэрнэт пакуль немагчыма, банкі такую паслугу не аказваюць.

Ля банкаматаў “Белпрамбудбанку” чэргі меншыя. Пытаюся ў маладога чалавека, які здымае грошы: чаму ён не разьлічваецца карткай за тавары ў краме?

(Хлопец: ) “Праблема такая, што не ва ўсіх крамах ёсьць такія апараты. Спрабавалі, але шмат у якіх крамах гэта не праходзіць”.

Былы старшыня Нацыянальнага банку Станіслаў Багданкевіч мяркуе, што беларусы пакуль папросту не гатовыя да таго, каб занадта актыўна карыстацца плястыкавымі карткамі.

(Багданкевіч: ) “Мне далі картку ў “Эканамічнай газэце”. Я ня так ужо й часта публікуюся там, аднак ганарар цяпер выплачваецца абавязкова празь “Беларусбанк”. Думаю, ідзе пэўная паказуха, фарсаваньне гэтага працэсу. Гэта апраўдаецца паступова, але не бязь цяжкасьцяў гэта будзе ісьці”.
XS
SM
MD
LG