Лінкі ўнівэрсальнага доступу

Жонка Астрэйкі: "Я бачыла, як КДБшнікі прыстаўлялі да яго пісталет"


Радыё Свабода Супрацоўнікі КДБ не адпусьцілі затрыманых актывістаў апазыцыйных рухаў. Цімафей Дранчук, Мікола Астрэйка і Аляксандр Шалайка падазраюцца ў паклёпе на Аляксандра Лукашэнку. Сваякам апазыцыянэраў паведамілі, што іх будуць трымаць трое сутак, а потым вырашаць іхны далейшы статус. Пракуратура, якая дала санкцыю на ператрус і КДБ, які вядзе сьледзтва, не камэнтуюць затрыманьні.

Аддзелы інфармацыі КДБ і пракуратуры не тлумачаць на якой падставе затрымалі некалькі чалавек па падазрэньню ў паклёпе на Аляксандра Лукашэнку. Дзяжурны КДБ паведаміў, што не валодае інфармацыяй:

(Дзяжурны: ) “У мяне ніякіх зьвестак пра затрыманых. Я нічога не магу вам камэнтаваць”.

Жонка Міколы Астрэйкі Паліна бачыла, як супрацоўнікі КДБ пагражалі пісталетам яе мужу.

(Паліна: ) “Мы зараз ня ведаем, як перадаць ім цёплыя рэчы ды харчаваньне. Я ў шоку. Я бачыла ў вакно, як яны падбеглі да машыны і прыстаўлялі да яго пісталет. Гэта нейкі сюррэалізм. Зразумела, гэта бачылі ўсе суседзі… Яго цягнулі як нейкага небясьпечнага злачынцу”.

Кіраўнік штабу Аляксандра Мілінкевіча Сяргей Калякін параўноўвае затрыманьні і ператрусы на кватэрах актывістаў апазыцыі ў Менску і ў рэгіёнах з аналягічнымі дзеяньнямі ўлады ў Польшчы ў 1981 годзе ў часы "Салідарнасьці".

(Калякін: ) “Ідзе паляваньне на дэмакратычных актывістаў. Спроба іх запалохаць, а на іх прыкладзе і астатняе грамадзтва. Гэта дасьць адваротны эфэкт. І ўлада страціць нават тую падтрымку, якую яна пакуль мае. Трэба ж паказаць, што ў краіне ёсьць нейкія бандыты, зь якімі трэба змагацца. Гэта апраўданьне таго бязьмежжа, якое мы назіралі сёньня і, я ўпэўнены, будзем назіраць заўтра і ў іншыя дні да маючых адбыцца выбараў”.

Сваякі затрыманых апазыцыянэраў 22 лютага заключаць дамовы з адвакатамі, каб тыя наведалі затрыманых. Пакуль невядома, дзе трымаюць Міколу Астрэйку, Цімафея Дранчука і Аляксандра Шалайку – у сьледчым ізалятары на Валадарцы, альбо ў так званай “амэрыканцы”.

Гл. таксама • КДБ учыніў ператрус у кватэры Цімафея Дранчука • Міліцыянты праніклі ў прыватную кватэру актывіста штабу Казуліна • КДБ сканфіскаваў аргтэхніку ў актывістаў “Партнэрства” і ў Магілёве • КДБ канфіскаваў кампутары ў лідэра "Партнэрства" • КДБ праводзіць ператрусы ў кватэрах актывістаў
XS
SM
MD
LG