Лінкі ўнівэрсальнага доступу

Сёньня Аляксандр Мілінкевіч запрашае да Палацу Рэспублікі


Радыё Свабода Агляд незалежнай прэсы за 17 лютага

“Наша Ніва” паведамляе, што Аляксандар Мілінкевіч сёньня пасьля ўрачыстай рэгістрацыі кандыдатаў на прэзыдэнта гатовы сустрэцца з выбарцамі ля Палацу Рэспублікі. Газэта нагадвае: афіцыйная цырымонія рэгістрацыі распачынаецца а 12-й гадзіне.

У артыкуле “Мяккі палітычны прысуд” тыднёвік зьвяртаецца да рашэньня Вярхоўнага суду па справе Сяргея і Аляксандра Скрабцоў. Гэтая ж тэма працягваецца і ў артыкуле “Цукерак я табе ня раю. Шкодна. І нават небясьпечна”.

Іншыя загалоўкі “Нашай Нівы”: “Пісьменьніца Святлана Алексіевіч зьяжджае ў Швэцыю”; “Партрэт Артура Фінькевіча” – самага маладога зь сёньняшніх беларускіх палітвязьняў”; “Мэмуары Васіля Дземянцея” – рэцэнзія на кнігу былога старшыні Вярхоўнага Савету.

Сёньня ў Брэсьце Каардынацыйнае бюро праграмы ТACIS завяршае трохдзённую вучобу для прадстаўнікоў вобласьці паводле канкрэтных сацыяльна-эканамічных праектаў. “Брестская газета” адзначае, што сёлета сумесныя праграмы накіраваныя пераважна на разьвіцьцё памежнай інфраструктуры. А па выніках працы за 15 гадоў кошт тэхнічнай дапамогі Эўразьвязу перавысіў 190 мільёнаў эўра.

“Брестская газета” таксама сёньня дасьледуе пэрспэктывы прадпрыемства па выпуску газавых і электрычных пліт. Цяпер “Брэстгазаапарат” экспартуе 80 працэнтаў сваёй прадукцыі ў Расею. “Рынак, аднак, можа быць страчаны пасьля далучэньня Расеі да Усясьветнай гандлёвай арганізацыі”, канстатуе рэгіянальнае выданьне.

Напярэдадні Міжнароднага дня роднай мовы газэта “Слуцкі кур’ер” друкуе ўмовы інтэлектуальнага спаборніцтва. Расказвае журналіст Сяргей Акінчыц.

(Акінчыц: ) “Слуцкая гарадзкая арганізацыя “Таварыства беларускай мовы імя Францыска Скарыны” прапануе чытачам прыняць удзел у віктарыне, прысьвечанай гэтаму сьвяту. Варыянты адказу трэба даслаць 19-га лютага. Як чакаецца, ТБМ узнагародзіць трох пераможцаў”.

Паводле Сяргея Акінчыца, адно з пяці пытаньняў тычыцца колькасьці беларускамоўных школаў у Слуцку. Прапануюцца наступныя адказы: 0; 1; 3. У горадзе, між тым, на сёньня 12 сярэдніх школаў і адна гімназія.
XS
SM
MD
LG