Лінкі ўнівэрсальнага доступу

Тэледэбатаў кандыдатаў на прэзыдэнцкіх выбарах ня будзе (абноўлены)


Радыё Свабода Сёньня Цэнтравыбаркам зацьвердзіў парадак выкарыстаньня дзяржаўных СМІ кандыдатамі на прэзыдэнта. Пастановай прадугледжаныя два 30-хвілінныя выступы прэтэндэнтаў на прэзыдэнцкае крэсла на першым канале Беларускага тэлебачаньня і на Першым канале Беларускага радыё, а таксама публікацыя іх праграмаў у сямі дзяржаўных газэтах: “Беларуская ніва”, “Звязда”, “Знамя юности”, “Народная газета”, Рэспубліка”, “Советская Белоруссия” і “7 дней”.

Старшыня ЦВК Лідзія Ярмошына паведаміла, што жараб’ёўка эфірнага часу адбудзецца адразу пасьля рэгістрацыі кандыдатаў, якая пройдзе 17 альбо 21 лютага. Выступы кандыдатаў будуць трансьлявацца ў запісе і не павінны ўтрымліваць заклікаў да гвалтоўнай зьмены канстытуцыйнага ладу, сацыяльнай і нацыянальнай варожасьці, зьнявагі і паклёпу на дзяржаўных асобаў і іншых кандыдатаў.

Спадарыня Ярмошына зазначыла, што сёньняшняя пастанова не пагаршае стану кандыдатаў на прэзыдэнта адносна прэзыдэнцкай кампаніі 2001 году. За час пасьля мінулых выбараў у Беларусі зьявілася некалькі новых агульнанацыянальных тэлеканалаў: ОНТ, СТБ, “Лад”. Аднак кандыдаты на прэзыдэнта ня змогуць зьвярнуцца і да іх гледачоў. Лідзія Ярмошына патлумачыла, што Выбарчы кодэкс прадугледжвае публікацыю праграмаў кандыдатаў ва ўсіх агульнанацыянальных газэтах, але не ўтрымлівае такой жа нормы адносна тэлебачаньня:

(Ярмошына: ) “Тут ужо Цэнтральная камісія мае права вызначыць, і яна вызначае з улікам тых лімітаў, якія ёй дае дзяржаўнае тэлебачаньне”.

Лідзія Ярмошына пасьля паседжаньня ЦВК таксама заявіла журналістам, што тэледэбатаў кандыдатаў, якія адбываліся падчас перадвыбарчай кампаніі 1994 году, сёлета ня будзе:

(Ярмошына: ) “Таму што наша заканадаўства не прадугледжвае тэледэбатаў”.

Акрамя таго, спадарыня Ярмошына заявіла, што публікацыя праграмаў кандыдатаў у недзяржаўных СМІ будзе расцэньвацца як матэрыяльная дапамога ім, што лічыцца незаконным.

Намесьнік кіраўніка перадвыбарчага штабу Аляксандра Казуліна Ўладзімер Нісьцюк мяркуе, што пытаньне ня ў тым, колькі эфірнага часу дадуць кандыдату і на колькіх тэлеканалах:

(Нісьцюк: ) “Пытаньне ў тым, што не дадуць сказаць у просты эфір, таму тое, што чалавек захоча сказаць, ён ня скажа. Калі ўсё гэта будуць рэзаць, чысьціць — гэта можна, а гэта не, то гэта ўжо ня сродкі масавай інфармацыі, гэта апарат, які зацікаўлена працуе на адзін бок”.
XS
SM
MD
LG