Лінкі ўнівэрсальнага доступу

logo-print

Пра якія сьпісы назіральнікаў АБСЭ гаварыў сакратар ЦВК?


Радыё Свабода Сёньня на прэсавай канфэрэнцыі сакратар Цэнтравыбаркаму Мікалай Лазавік зрабіў заяву адносна міжнародных назіральнікаў АБСЭ. Ён нагадаў што 27 студзеня ў ЦВК адбылася сустрэча з кіраўніком ацэначнай місіі АБСЭ спадаром Джэралдам Мітчэлам. Спадар Мітчэл паінфармаваў, што рашэньне пра накіраваньне місіі назіральнікаў АБСЭ яшчэ не прынята, і ў выпадку прыняцьця такога рашэньня доўгатэрміновыя назіральнікі будуць прыбываць у Беларусь прыкладна з 6 лютага.

Паводле спадара Лазавіка, ЦВК выказаў пажаданьне, каб місія АБСЭ выступала як незалежны юрыдычны экспэрт і не спрабавала браць на сябе функцыяў удзельніка палітычнага працэсу, і каб заключэньне АБСЭ было заснавана на ўласных назіраньнях сябраў місіі, а не на сыгналах добразычліўцаў, як гэта часам адбывалася на мінулых выбарах.

(Лазавік: ) “У сувязі з гэтым мы выказалі зьдзіўленьне: калі склад місіі яшчэ ня вызначаны, больш за тое — яшчэ і рашэньне аб накіраваньні місіі АБСЭ не прынята, то якім чынам сьпіс доўгатэрміновых назіральнікаў АБСЭ па рэгіёнах Беларусі стаў ужо вядомы перадвыбарчаму штабу спадара Мілінкевіча і надрукаваны ў выдадзенай гэтым штабам брашуры? У сьвятле гэтага факту нэўтральнасьць і аб’ектыўнасьць місіі АБСЭ для мяне застаецца пад вялікім сумневам”.

Паводле кіраўніка ініцыятыўнай групы Аляксандра Мілінкевіча Аляксандра Бухвостава, такая брашура сапраўды была надрукавана і частка яе затрымана міліцыяй. Але ў ёй надрукаваны сьпісы назіральнікаў АБСЭ, якія былі падчас парлямэнцкіх выбараў 2004 году. Спадар Бухвостаў камэнтуе выказваньні спадара Лазавіка:

(Бухвостаў: ) “Была падрыхтавана брашура для назіраньня. Як прыклад засталіся адрасы назіральнікаў Бюро дэмакратычных інстытутаў і правоў чалавека АБСЭ, якія назіралі за парлямэнцкімі выбарамі. І на падставе гэтай брашуры такую лухту распавядаюць”.
XS
SM
MD
LG