Лінкі ўнівэрсальнага доступу

Латвія будзе адказваць за Беларусь у старшынстве Эўразьвязу


Радыё Свабода Старшынства Эўрапейскага Зьвязу ў Беларусі сёлета на працягу першай паловы году будзе прадстаўляе Латвія, паведамляе "Вaltic Times" са спасылкай на латвійскае МЗС.

Латвія будзе ажыцьцяўляць каардынацыю паміж Брусэлем і Менскам, інфармаваць эўрапейскія краіны і арганізацыі пра падзеі ў Беларусі, а таксама беларускае кіраўніцтва пра актуальныя рашэньні эўрапейскіх арганізацыяў па беларускай праблематыцы.

Кандыдатура Латвіі ў якасьці прадстаўніка цяперашняга старшыні Эўразьвязу – Аўстрыі (гэтая краіна ня мае дыпляматычнай місіі ў Беларусі) ухваленая брусэльскім кіраўніцтвам. Гаворачы пра выбар ЭЗ, латвійскі міністар замежных справаў Артыс Пабрыкс адзначыў: “Гэта сьведчыць пра высокую ацэнку нацыянальнай дыпляматыі ды таксама ёсьць шанцам прадэманстраваць сябе ў міжнароднай палітыцы”.

Кіраўнік латвійскага МЗС лічыць неабходным стварэньне адзінай эўрапейскай стратэгіі ў дачыненьні да Беларусі. “Калі краіны Захаду будуць праводзіць адзіную палітыку ў дачыненьні Беларусі паводле адзіных прынцыпаў, дык іхная падтрымка будзе мець большае значэньне і зробіць мацнейшае ўражаньне на беларускае грамадзтва”, сказаў Артыс Пабрыкс ў часе апошняй сустрэчы міністраў ЭЗ і ЗША.
XS
SM
MD
LG