Лінкі ўнівэрсальнага доступу

“Трэба быць чалавеку добра музыкальнаму, каб ён мог на паперы обазначыць нотамі тыя гукі, якія чалавек пяе або іграе”


Падрыхтаваў Зьміцер Падбярэскі Пра што пісала беларуская прэса 18 студзеня ў розныя гады

“Беларуская крыніца”, 1926 год. Арганісты пра збор беларускіх народных песень:

“Сабраць самы тэкст песьні беларускай рэч не цяжкая. Словы песьні можа запісаць кожны, хто хоць троха ўмее пісаць, а запісаць мелодыю песьні — гэта рэч ня лёгкая, і гэта ня ўсякі можа зрабіць. На гэта трэба быць чалавеку добра музыкальнаму, каб ён мог на паперы обазначыць нотамі тыя гукі, якія чалавек пяе, або іграе і на вёсках паміж беларусамі рэдка дзе знойдзецца такі чалавек, які мог-бы гэта зрабіць. У гэтай справе вялізарную роль маглі-б адыграць у парахвіях арганістыя, маючыя найбольшую стычнасьць з беларусамі”.

“Комуніст”, 1936 год. Інфармацыя БЕЛТА:

“16-га студзеня раніцай дадзен старт лыжнаму прабегу Віцебск—Масква. У прабезе ўдзельнічае 7 студэнтаў-выдатнікаў ветэрынарнага інстытута: Ануфрыеў (камандзір), Аўдзеенка (палітрук), Кантар, Хварасцін, Ковака, Чырыкаў, Чарнухін. Лыжнікі панеслі рапарт Наркому Соўгасаў СССР тав.Калмановічу аб поспехах у вучобе. На прыпынках у калгасах удзельнікі прабега будуць арганізоўваць прапрацоўку даклада тав.Молатава на сесіі ЦВК Саюза ССР”.

“ЛіМ”, 1966 год. Мастак С.Герус:

“Вельмі дрэнна рэкламуюцца нашы музеі. У Мінску амаль няма шчытоў, на якіх хаця б проста паведамлялася аб тым, што існуе той ці іншы музей. А пра мастацкія выстаўкі, якія наладжваюцца ў нас у апошні час багата, можна даведацца толькі ля памяшкання самога музея або будынка, дзе размешчана выстаўка. Па прыклады хадзіць далёка не трэба. Пра мастацкія выстаўкі, якія экспануюцца ў салоне-магазіне на Ленінскім праспекце, можна даведацца толькі з рэкламы ля салона, пра выстаўкі ў Дзяржаўным мастацкім музеі БСССР — толькі па рэкламе ля будынка музея… А дзе рэклама музеяў Янкі Купалы і Якуба Коласа?”
XS
SM
MD
LG