Лінкі ўнівэрсальнага доступу

Пракурорскае папярэджаньне “дзеля прафіляктыкі”


Радыё Свабода Сёньня да пракурора Смаргонскага раёну быў выкліканы Алесь Дзергачоў. Ён кіруе штабам ініцыятыўнай групы Аляксандра Мілінкевіча ў Смаргонскім раёне. Пракурор Мікалай Маліноўскі прапанаваў яму азнаёміцца зь пісьмовым папярэджаньнем.

У афіцыйным папярэджаньні аб недапушчальнасьці парушэньня закону гаворыцца, што Алесь Дзергачоў займаецца выпускам бюлетэню “Наш Смаргонскі край”, у якім адлюстроўваюцца пытаньні выбарчай кампаніі, а таксама вытрымкі з розных газэтаў і выступленьняў. У пракурорскім дакумэнце зазначана: “Дзеля папярэджаньня магчымага парушэньня закону папярэджваю аб недапушчальнасьці ў далейшым парушэньня Закону “Аб друку і іншых сродках масавай інфармацыі”, выбарчага заканадаўства і іншых законаў Рэспублікі Беларусь”.

Свае дзеяньні пракурор Мікалай Маліноўскі патлумачыў наступным чынам:

(Маліноўскі: ) “Таму што ён у далейшым будзе яшчэ выпускаць свае газэты. Так належыць: а раптам дапусьціць што-небудзь? Дык вось — каб не дапусьціў. Лепей папярэдзіць, чым пазьней караць”.

Алесь Дзергачоў па адукацыі юрыст і сам вельмі зьдзіўлены такім папярэджаньнем:

(Дзергачоў: ) “Я думаю, што гэта ўжо ад вялізнага страху робіцца. Яны ня ведаюць, што рабіць. Яны бачаць, што друкаваная прадукцыя выходзіць, яна законная, але яе трэба нейкім чынам прыкрыць. Запалохаць заснавальніка, напрыклад”.
XS
SM
MD
LG