Лінкі ўнівэрсальнага доступу

Якой будзе кампэнсацыя страчаных ільготаў для міліцыянтаў?


Алег Грузьдзіловіч, Менск Празь месяц уступіць у сілу закон, паводле якога страцяць ільготы шэраг катэгорый насельніцтва, у тым ліку вэтэраны, інваліды і міліцыянты. Што да апошніх, для іх ужо падрыхтаваная вельмі неблагая кампэнсацыя.

Урадавую пастанову, паводле якой міліцыянты атрымаюць кампэнсацыю за страчаную льготу ў выглядзе бясплатнага праезду, ужо падпісаў прэм’ер-міністар Сяргей Сідорскі. Выплаты будуць называцца кампэнсацыяй за выкарыстаньне службовага транспарту ў службовых мэтах. Кампэнсацыя прадугледжаная немалая: супрацоўнік Міністэрства ўнутраных спраў, менскай гарадзкой ці абласной управы міліцыі можа разьлічваць на 150 даляраў штомесячнага дадатку да заробку, супрацоўнікі ўнутраных органаў раённага ўзроўню — на 130 даляраў дадатку, іншым выплацяць па 110 даляраў.

Назіральнікі ўжо падлічылі, што цяперашнія льготы абыходзіліся бюджэту куды таньней. Пакуль міліцыянты езьдзяць ў грамадзкім транспарце бясплатна, паказваючы кантралёрам службовыя пасьведчаньні. Пры сярэдніх коштах на праязныя 40 тысяч гэта азначае, што штомесяц транспартная льгота на кожнага міліцыянта складае 20 даляраў. Кампэнсацыя ж прапануе выплату як найменей ста даляраў. “Плаціць жа будуць ня ўсім, а толькі тым, хто выконвае службовыя заданьні”, -- заявілі мне ў прэсавай службе МУС, але дакладны мэханізм кампэнсацыі не патлумачылі. Кіраўнік прэсавай службы Кацярына Самусенкава-Шэлегава сказала, што ёй патрэбен час на вывучэньне дакумэнту, але пасьля яе тэлефон маўчаў.

Праваабаронца Гары Паганяйла мяркуе: чыноўнікі заўсёды знойдуць магчымасьць кампэнсаваць сабе пэўныя страты ад адмены льгот. Што да простага насельніцтва, менавіта зь яго кішэні будуць плаціць кампэнсацыю міліцыянтам:

“Савет міністраў распараджаецца ўласнасьцю Беларусі, у тым ліку і сабранымі падаткамі ў выглядзе бюджэту. Зь якіх меркаваньняў ён дасьць такую кампэнсацыю праваахоўным органам? Бо, як кажуць, на іх штыках трымаецца сёньняшні рэжым”.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG