Лінкі ўнівэрсальнага доступу

Віцебск: сябры адведалі магілы былых партыйцаў КХП БНФ


Радыё Свабода, Віцебск Група віцебскіх актывістаў наведала могілкі ў вёсцы Друкава, дзе пахаваны была старшыня Віцебскай абласной пады КХП БНФ Уладзімер Плешчанка, а таксама месца пахаваньня ягонага аднапартыйца Рамана Салаўяна на гарадзкіх могілках каля вёскі Копці.

Над магілай Уладзімера Плешчанкі сябры ўзьнялі бел-чырвон-белы сьцяг, усклалі да помніка кветкі ды запалілі сьвечкі.

Сябры КХП-БНФ каля магілы Ўладзімера Плешчанкі, 3.11.2007
Каля магілы Ўладзімера Плешчанкі

У невялікай прамове на магіле трагічна загінулага ў 24-гадовым узросьце Рамана Салаўяна старэйшы віцебскі апазыцыянэр Барыс Хамайда згадаў, што гэты хлопец уваходзіў у групу легендарнага Мірона. Некалькі бел-чырвон-белых сьцягоў былі ўзьнятыя над Віцебскам дзякуючы мужнасьці й адвазе гэтага хлопца, і ў Дзень памінаньня памерлых над ягонай магілай таксама лунаў нацыянальны сьцяг.

Сябры КХП-БНФ каля магілы Рамана Салаўяна, 3.11.2007
Каля магілы Рамана Салаўяна

Меркавалася, што некалькі дзён таму, 28-га кастрычніка, ушанаваць памяць абодвух віцебскіх апазыцыянэраў зможа большая колькасьць ахвотных. Аднак міліцыянты Віцебскага РАУСу затрымалі аўтобус, які вёз 27 пасажыраў на могілкі. Усіх, хто сабраўся на грамадзянскую паніхіду, адвезьлі ў пастарунак, а пяцёх актывістаў на наступны дзень пакаралі штрафамі нібыта за ўдзел у несанкцыянаванай акцыі. Іх абвінавацілі ў тым, што каля вёскі Паляі яны разгарнулі бел-чырвон-белыя сьцягі, каб прайсьці пад імі да месца масавых расстрэлаў ахвяр сталінскіх рэпрэсіяў і ўсталяваць там мэмарыяльны крыж. Сёньня група віцебскіх актывістаў наведала і гэтае месца.

Хвіліна маўчаньня на месцы масавых расстрэлаў каля вёскі Паляі, 3.11.2007
Хвіліна маўчаньня на месцы масавых расстрэлаў каля вёскі Паляі
XS
SM
MD
LG