Лінкі ўнівэрсальнага доступу

logo-print

На Дзяды на менскіх могілках маліліся за памерлых


Галіна Абакунчык, Менск Дзень памяці продкаў, Дзяды, на менскіх могілках адзначалі набажэнствамі й асьвячэньнямі магілаў. Многія людзі прыходзілі, каб прыбраць пахаваньні, ускласьці кветкі й запаліць сьвечкі. На адных з найстарэйшых могілак Менску, Кальварыйскіх, пабывала наша карэспандэнтка.

Перад брамаю Кальварыйскіх могілак — жывыя і штучныя кветкі, а таксама сьвечкі. Шматлікім наведнікам іх прадаюць сёстры — спадарыні Валянціна і Яўгенія.

Карэспандэнтка: “Ці часта вы прадаяце тут кветкі?”

Валянціна: “Прадаем, бо малавата пэнсіі, не хапае. Трэба ж неяк выжываць?”

Карэспандэнтка: “Ці бяруць вашы кветачкі?”

Яўгенія: “Бяруць, і сьвечкі бяруць”.

Карэспандэнтка: “А шмат людзей ідзе цяпер?”

Валянціна: “Шмат. І маладых шмат людзей. Вунь, глядзіце колькі машынаў едзе. Бо вялікае сьвята — Дзяды і Ўсіх сьвятых”.

Карэспандэнтка: “Прызнаюць за сьвяты?”

Яўгенія: “Прызнаюць. Чаму ж не прызнаюць? Ідуць і праваслаўныя, і каталікі, усе ідуць. І з амбасады нават прыяжджалі. Прыгожыя вянкі, кошыкі, кветкі несьлі. Ой, што вы!”

Менскія Кальварыйскія могілкі традыцыйна лічацца каталіцкімі. Таму Дзяды тут пачалі адзначаць яшчэ напярэдадні — урачыстым набажэнствам у касьцёле Ўзвышэньня крыжа з нагоды Дня ўсіх сьвятых.

Набажэнства праводзіў біскуп Антоні Дзям’янка:

“Дарагія браты і сёстры! Наш Пан першы даў нам прыклад, што свой крыж мы павінны несьці ў цярплівасьці й разумна выкарыстаць час, які зьяўляецца для нас багацьцем”.

Набажэнствы і асьвячэньні магілаў сёньня адбываліся на ўсіх могілках Менску. На Кальварыі асьвячэньне будзе ісьці два дні.

Сёньня і ўчора сюды ідзе шмат людзей, кажуць супрацоўніцы могілак Галіна і Марыя:

Галіна: “Гэтымі днямі людзі прыходзяць прыбіраць. А ўжо сёньня, менавіта на Дзяды, вельмі шмат людзей. Шмат у касьцёле запісана на памінальныя службы”.

Карэспандэнтка: “Звычайна людзі прыходзяць на магілу да сваякоў ці да нейкіх вядомых людзей?”

Марыя: “І да сваякоў, і да вядомых, і на магілкі, якія няма каму даглядаць”.

Карэспандэнтка: “А ці ведаеце пахаваньні якіх-небудзь вядомых людзей?”

Марыя: “А вось жа пісьменьнік — Вацлаў Іваноўскі”.

Карэспандэнтка: “А хто прыбірае гэтую магілу?”

Марыя: “Прыхаджане, і мы прыбіраем”.

Галіна: “Людзі прыбіраюць магілкі, якія вакол касьцёлу. Іх вельмі шмат, і яны вельмі старыя, іх няма каму даглядаць. І людзі прыходзяць і прыбіраюць”.

На разьвітаньне гутару з пані Ядвігай — сталай і даўняй наведніцай Кальварыйскіх могілак:

Карэспандэнтка: “Якімі вам памятаюцца Дзяды вашага дзяцінства?”

Ядвіга: “Хадзілі ў касьцёл, хто ў царкву — маліцца. Пасьля ехалі на могілкі. Дома таксама паміналі: на стале на ноч пакідалі сем страваў — гэта значыць, каб дзяды частаваліся. Бабуля прымаўку такую казала: “Дзяды, дзяды ідзіце сюды. Пагуляйце, паежце і — кыш дадому ляціце”. І акно адчынялі для дзядоў”.

Карэспандэнтка: “Ці мяняецца нешта з гадамі?”

Ядвіга: “Так. Некалі баяліся хадзіць маліцца, і на могілках таксама. А цяпер — ідуць памінаюць. Трэба хадзіць — каб да нас, калі мы пойдзем да іх у госьці, таксама хадзілі”.

Дзяды, Кальварыйскія могілкі, Менск, 2.11.2007
Біскуп Антоні Дзям’янка падчас імшы

Дзяды, Кальварыйскія могілкі, Менск, 2.11.2007
На Кальварыі каля капліцы

Дзяды, Кальварыйскія могілкі, Менск, 2.11.2007
На магіле Вацлава Іваноўскага сьвечкі і кветкі

Дзяды, Кальварыйскія могілкі, Менск, 2.11.2007
Перад імшою на Дзяды

Дзяды, Кальварыйскія могілкі, Менск, 2.11.2007
Працэсія перад сьвячэньнем могілак

Дзяды, Кальварыйскія могілкі, Менск, 2.11.2007
Асьвячэньне пахаваньняў

(Фота Ю.Дзядзінкіна)

Дзяды-2007, 28.10.2007 Дзяды. Шэсьце і мітынг, 28.10.2007
XS
SM
MD
LG