Лінкі ўнівэрсальнага доступу

У Палату прадстаўнікоў перадалі больш за 40 тыс. подпісаў грамадзянаў


Любоў Лунёва, Менск Каля двух дзясяткаў чалавек, прадстаўнікоў палітычных партыяў і грамадзкіх арганізацыяў, перадалі подпісы грамадзянаў супраць скасаваньня льготаў у Палату прадстаўнікоў. Спэцназаўцы перашкаджалі прайсьці ў будынак лідэру Аб’яднанай грамадзянскай партыі Анатолю Лябедзьку і Валянціне Палевіковай. Апазыцыянэры, аднак, упэўненыя, што дэпутаты не абмяркуюць просьбу дзясяткаў тысяч грамадзянаў.

На менскай плошчы Незалежнасьці за дзьве гадзіны да пачатку працы сэсіі Палаты прадстаўнікоў зьявіліся кіраўнікі Менскай міліцыі і спэцслужбаў.

А дзясятай раніцы некалькім рэгіянальным актывістам дэмакратычнага руху, якіх спэцназаўцы ня ведалі ў твар, удалося прайсьці ў будынак Дому ўраду, каб перадаць подпісы грамадзянаў супраць скасаваньня льготаў дэпутатам Палаты прадстаўнікоў.

А.Лябедзька: “Якая краіна — такі й парлямэнт”

Праз паўгадзіны да іх далучыліся яшчэ некалькі чалавек, але калі на плошчу выйшаў Анатоль Лябедзька, спэцназаўцы ўтварылі жывы ланцуг і перакрылі яму шлях.

Анатоля Лябедзьку не пускаюць у Дом ураду, Менск, 2.10.2007

Анатоля Лябедзьку не пускаюць у Дом ураду, Менск, 2.10.2007

Анатоля Лябедзьку не пускаюць у Дом ураду, Менск, 2.10.2007

Анатоля Лябедзьку не пускаюць у Дом ураду, Менск, 2.10.2007

Потым па рацыі прагучала каманда “Прапусьціць” — і лідэр Аб’яднанай грамадзянскай партыі разам з Валянцінай Палевіковай і Сяргеем Калякіным прайшлі ў будынак.

Анатоль Лябедзька ў Доме ўраду запатрабаваў кнігу скаргаў:

“Якая краіна — такі й парлямэнт. Мне сорамна, бо я тут шэсьць гадоў адпрацаваў. Тады ў галаву б нікому не прыйшло не пускаць людзей у будынак. Тое, што сёньня адбываецца, папросту ганебна.

Напісалі, што частку людзей фізычна не пусьцілі, парушылі іх канстытуцыйныя правы. Чатыры скаргі ў кнізе азначаюць толькі адно — нікому яны не патрэбныя. Мы напісалі цяпер тэксту значна больш, чым там за тры гады”.

“Будзем чакаць, што далей”

Сацыяльныя пікеты, збор подпісаў грамадзянаў у Палату прадстаўнікоў і пачатак працэдуры адкліканьня некаторых дэпутатаў — усё гэта частка падрыхтоўкі да “Сацыяльнага маршу”.

Старшыня аргкамітэту Валеры Ўхналёў паведаміў “Свабодзе”:

“Ім не хапае розуму, бо вось гэты ланцуг стаіць са спэцназаўцаў, бо яны ўчынілі бойку зь Лябедзькам, не пускалі яго... Калі б улада была б разумнейшая, то зразумела, што прайшлі ўсе, хто жадаў прыйсьці да дэпутата за пяць хвілінаў.

Аддалі б усе тыя подпісы, якія яны сабралі. Якім чынам бы рэагавалі дэпутаты — гэта ўжо іншая справа. Будзем чакаць, што далей”.

Ініцыятары збору подпісаў грамадзянаў за вяртаньне сацыяльных ільготаў каля Дома ўраду, Менск, 2.10.2007

Ініцыятары збору подпісаў грамадзянаў за вяртаньне сацыяльных ільготаў каля Дома ўраду, Менск, 2.10.2007

Прадстаўнікі апазыцыі ня вераць, што лісты з подпісамі агучаць на сэсіі

Прадстаўнікі грамадзкіх арганізацыяў ліквідатараў наступстваў катастрофы на Чарнобыльскай АЭС перадалі подпісы не асобна дэпутатам, а ў камісію.

Сярод іх быў Васіль Сіліверст з Гомельшчыны:

“Вельмі шмат пытаньняў, якія тычацца нас, чарнобыльцаў. Фактычна, гэта вырашэньне нашага жыцьця і нашай сьмерці”.

Аляксандар Ваўчанін з Барысава дадаў:

“Гэтае пытаньне трэба вырашаць, бо сёньня Беларусь — адзіная краіна, дзе адмененыя ўсе кампэнсацыі і льготы. Трэба й міжнародны статус ліквідатара наступстваў аварыі на Чарнобыльскай АЭС. Гэта катастрофа ўсясьветнага маштабу, і мы абаранялі ня толькі Беларусь, але і ўвесь сьвет”.

Ініцыятары збору подпісаў грамадзянаў за вяртаньне сацыяльных ільготаў каля Дома ўраду, Менск, 2.10.2007

Прадстаўнікі апазыцыі ня вераць, што лісты з подпісамі грамадзянаў і патрабаваньнем не забіраць льготы агучаць на паседжаньні сэсіі. Але апазыцыянэры будуць зьбіраць подпісы і далей, каб мець аргумэнты для зьмены сацыяльнай палітыкі ў краіне.

Апазыцыянэры панясуць сабраныя подпісы ў Палату прадстаўнікоў, 2.10.2007 У Менску затрыманыя рэгіянальныя актывісты, 1.10.2007
XS
SM
MD
LG