Лінкі ўнівэрсальнага доступу

Італьянскіх сьвятароў судзяць за ўтойваньне Вікі Мароз


Алена Струвэ Два італьянскія сьвятары паўстануць перад Генуэскім судом за леташняе ўтойваньне Вікі Мароз. На судовы працэс, які распачаўся гэтымі днямі ў Генуі, выкліканыя ў якасьці падазраваных дон Даніла Грыла і дон Франсіс Дарбэле. У італьянскім каталіцкім сьвеце такі факт называюць беспрэцэдэнтным.

Паводле матэрыялаў пракуратуры, сьвятарам Грыла і Дарбэле разам зь сям’ёй Джуста-Барначын інкрымінуецца ўдзел у леташнім 20-дзённым таемным утрыманьні беларускай сіраты ў Альпах. Ні настаяцель прыходу з Кагалета Даніла Грыла, ні настаяцель кляштару Сэнт-Айен у альпійскай вобласьці Вале д’Аоста Франсіс Дарбэле ня лічаць сябе вінаватымі.

Сьвятар з Кагалета дон Даніла Грыла па-ранейшаму перакананы: “Злачынствам ёсьць ня ўтойваньне дзяўчынкі, а яе гвалтоўнае разлучэньне зь сям’ёй. Менавіта за гэта хтосьці аднойчы панясе адказнасьць”.

Год таму, калі ўся Італія абмяркоўвала ўчынак сужэнцаў Алесандра Джуста і Марыі К’яры Барначын, Даніла Грыла без ваганьняў прыняў бок сям’і з Кагалета. Тады ён публічна заявіў, што нават парушыць закон дзеля вышэйшай справядлівасьці. 7 верасьня, калі Менск настойліва патрабаваў вярнуць беларускую дзяўчынку назад на радзіму, сьвятар з Кагалета павёз Віку Мароз, а таксама Марыю Борды (маці Алесандра) ды Элену Даніна (маці Марыі К’яры) да айца Франсіса Дарбэле, у гасьцявы дом кляштару ў Вале д’Ааоста, што на мяжы з Швэйцарыяй.

Паводле Франсіса Дарбэлэ, калі ён прымаў рашэньне аб прытулку для беларускай дзяўчынкі, ён ведаў пра магчымае прыцягненьне да судовай адказнасьці. “У мяне не ўзьнікла ніякага сумневу, бо я быў знаёмы з гісторыяй гэтай сіраты”, сказаў сьвятар.

Праз 20 дзён, 26 верасьня 2006, дзякуючы невядомым інфарматарам, карабінэры знайшлі Віку Мароз у кляштары дона Дарбэлэ. Як перакананы айцец Даніла Грыла, тыя, хто гэта зрабіў, “зламалі дзяўчынцы жыцьцё і гэта заўсёды застанецца на іхным сумленьні”

Прыцягненьне дона Грыла і дона Дарбэлэ да судовай адказнасьці выклікала першыя абуральныя водгукі ў каталіцкім сьвеце.

“Божа, іх будуць судзіць! Гэта жах і выглядае як барацьба супраць царквы, -- кажа ватыканскі сьвятар.– У дэмакратычным сьвеце царква заўсёды давала прытулак тым, каму ён быў неабходны, і паміж Законам і Эвангельлем выбірала Эвангельле”.

Тым часам у беларускай амбасадзе ў Італіі, якая ініцыявала гэту судовую справу, заявілі:

“Беларуская амбасада адсочвае працэс. У выпадку неабходнасьці мы гатовыя да супрацоўніцтва.”

• У Італіі завершанае расьледаваньне па справе сямейнай пары Джуста-Барначын, 17.09.2007 • Чаму Віку Мароз ня выпусьцілі ў Італію?, 08.08.2007
XS
SM
MD
LG