Лінкі ўнівэрсальнага доступу

Адбылося ўручэньне прэміі імя Зьмітра Завадзкага ляўрэатам 2007 году


Любоў Лунёва, Менск Сёньня ўвечары адбылося ўрачыстае ўручэньне прэміі імя Зьмітра Завадзкага ляўрэатам 2007 году. Першы канал Расейскага тэлебачаньня шосты раз уручае прэмію за прафэсіяналізм і мужнасьць. Ляўрэатамі 2007 году сталі Анатоль Гатоўчыц, Натальля Макушына і Генадзь Барбарыч. Прэміяй імя Ігара Гермянчука Беларуская асацыяцыя журналістаў узнагародзіла галоўнага рэдактара “Народнай Волі” Ёсіфа Сярэдзіча. На ўрачыстую цырымонію запрасілі ляўрэатаў мінулых гадоў, сярод якіх была наша карэспандэнтка Любоў Лунёва.

На ўрачыстай цырымоніі ўручэньня прэміі імя Зьмітра Завадзкага прысутнічалі аглядальнік ОРТ Павал Шарамет, маці Зьмітра Завадзкага Вольга Рыгораўна, Сьвятлана Завадзкая, Юры Завадзкі, журналісты і амбасадары краінаў Эўразьвязу.

Гарадзенская журналістка Натальля Макушына пасьля ўручэньня прэміі сказала некалькі словаў Радыё Свабода:

“Вельмі ўдзячная маім калегам, якія вылучылі мяне на гэты дыплём, які яшчэ раз нагадвае нам імя гэтага сапраўды мужнага чалавека і прафэсіянала Зьмітра Завадзкага. Хвалююся, бо вельмі цяжка стаяць перад гэтымі камэрамі. Здаецца, што лягчэй працаваць у нашых цяжкіх умовах, чым тое, што сёньня тут адбывацца... Але вельмі прыемнае хваляваньне”.

Гаворыць Анатоль Гатоўчыц:

“Стаць ляўрэатам вельмі прэстыжнай прэміі за мужнасьць і прафэсіяналізм вельмі прыемна. Наш абавязак – даведацца, які лёс Зьмітра Завадзкага. Гэта накладае на нас пэўны абавязак. Займацца журналістыкай і ня быць мужным – у нашых умовах папросту немагчыма”.

Яшчэ адзін ляўрэат, супрацоўнік тыднёвіка "Беларусы і рынак" Генадзь Барбарыч дадаў:

“З Завадзкім я пазнаёміўся ў верасьні 1997 года, калі пачалася справа за пераход беларуска-літоўскай мяжы. Тады мне падавалася, што, калі мы адаб’ем наступ дзяржавы на журналістаў ОРТ, то ў Беларусі ўсё зьменіцца. Але я памыліўся. Абсурд толькі пачынаўся. Я даведаўся шмат страшных фактаў”.

Павал Шарамет са шкадаваньнем канстатаваў, што ў Беларусі катастрафічнымі тэмпамі памяншаецца колькасьць недзяржаўных выданьняў.

Беларуская асацыяцыя журналістаў узнагародзіла рэдактара “Народнай Волі” Ёсіфа Сярэдзіча прэміяй імя Ігара Гермянчука. Падчас уручэньня прэміі Ёсіф Сярэдзіч сказаў:

“Я добра ведаў гэтага чалавека. І ня толькі як журналіста, як рэдактара, але як грамадзкага дзеяча вялікага маштабу. Дзякуючы Ігару Гермянчуку, Зянону Пазьняку і ўсім тым дэпутатам, якія ім дапамагалі, мы змаглі адстаяць і сувэрэнітэт, і вырашыць шмат іншых на той час актуальных праблем”.

Журналісты віншавалі сваіх калег-ляўрэатаў. Наступная цырымонія мусіць адбыцца ў верасьні наступнага году.

Уручэньне прэміі імя Зьм.Завадзкага, Менск, 10 верасьня 2007 г.
Сёлетнія ляўрэаты прэміі

Уручэньне прэміі імя Зьм.Завадзкага, Менск, 10 верасьня 2007 г.
Прысутныя журналісты

Уручэньне прэміі імя Зьм.Завадзкага, Менск, 10 верасьня 2007 г.

Уручэньне прэміі імя Зьм.Завадзкага, Менск, 10 верасьня 2007 г.
Маці Зьмітра Завадзкага Вольга Рыгораўна

Уручэньне прэміі імя Зьм.Завадзкага, Менск, 10 верасьня 2007 г.
Сьвятлана Завадзкая, Жана Літвіна, Павал Шарамет
XS
SM
MD
LG