Лінкі ўнівэрсальнага доступу

logo-print

Андрэй Клімаў ужо больш як месяц асуджаны


Любоў Лунёва, Менск Андрэй Клімаў пакуль што знаходзіцца ў менскім сьледчым ізалятары на вуліцы Валадарскага. Блізкія паплечнікі і сябры Андрэя Клімава ня ведалі, што яго судзілі яшчэ на пачатку жніўня і пакаралі зьняволеньнем за публікацыю артыкулу ў інтэрнэце. Упершыню ніхто з журналістаў і прадстаўнікоў апазыцыі ня ведаў пра суд над палітвязьнем.

Вядома, што тыдзень таму сваякі Андрэя Клімава перадалі яму перадачу ў сьледчы ізалятар на вуліцы Валадарскага.

Андрэя Клімава арыштавалі 3 красавіка, калі ён прыйшоў у Менскую гарадзкую пракуратуру даведацца пра акалічнасьці крымінальнай справы, заведзенай супраць яго за артыкул у інтэрнэце. Спачатку палітык меў статус падазраванага ў абразе Аляксандра Лукашэнкі і паклёпе на яго. Пасьля допыту Клімава абвінавацілі ў закліках да зьвяржэньня існуючага ладу.

У чэрвені сябры і знаёмыя Андрэя Клімава перасталі атрымліваць ад яго лісты. Маці Андрэя і жонка Тацяна Леановіч не адказвалі на тэлефанаваньні.

Памочнік Андрэя з “Руху Андрэя Клімава” Цімафей Дранчук сказаў “Свабодзе”, што чуткі пра суд над Клімавым да яго даходзілі, але ён ня мог іх праверыць:

“Пазыцыя сваякоў Андрэя абсалютная незразумелая. Я папросту не магу патлумачыць такія паводзіны. Магу толькі выказваць вэрсіі, што іх альбо запалохалі, альбо яшчэ нешта... Ніхто, акрамя іх, ня мог даведацца пра лёс Клімава. Яны маюць магчымасьць зь ім кантактаваць, накіроўваць да яго адваката, дазнавацца, калі адбудзецца суд, калі скончыцца сьледзтва і г.д. А ліставаньне наша скончылася даўно з абсалютна незразумелых прычынаў”.

Нават у тым разе, калі Андрэй Клімаў падаў скаргу на прысуд, у хуткім часе яго маюць перавесьці адбываць пакараньне ў папраўчую калёнію.

Гэта трэцяя судзімасьць Андрэя Клімава. Першы раз яго арыштавалі 11 лютага 1998 году і ў жніўні 1999 году пакаралі пазбаўленьнем волі на 6 гадоў, абвінаваціўшы ў эканамічных злачынствах. Але на волю палітык выйшаў раней за прысуджаны тэрмін.

10 чэрвеня 2005 году Андрэя Клімава пакаралі абмежаваньнем волі на 18 месяцаў, прызнаўшы вінаватым у арганізацыі вулічнай акцыі пад лёзунгамі адстаўкі Аляксандра Лукашэнкі. На волю Андрэй выйшаў 22 сьнежня 2006 году. А праз тры месяцы яго зноў арыштавалі.

• Прысуд Андрэю Клімаву: два гады турмы за артыкул у інтэрнэце, 07.09.2007 • Тацяна Клімава: “Муж жывы, канешне”, 01.09.2007 • І.Шынкарык: “Клімаў наконт здароўя перабольшваць ня будзе” , 06.06.2007 • “Гэта спроба палітычнага забойства няўгоднага палітыка Андрэя Клімава”, 06.06.2007 • Тэрмін арышту Андрэя Клімава падоўжылі яшчэ на тры месяцы, 31.05.2007 • Андрэю Клімаву раяць забыцца, што ён быў дэпутатам, 24.04.2007 • Андрэй Клімаў не бярэ ўдзелу ў сьледчых дзеяньнях, 19.04.2007 • Андрэй Клімаў – у камэры, дзе яго трымалі падчас мінулага арышту, 09.04.2007 • Андрэй Клімаў заявіў пра невінаватасьць і адмовіўся сьведчыць, 05.04.2007
XS
SM
MD
LG