Лінкі ўнівэрсальнага доступу

Гомель: 100-мільённы пазоў супраць камунальнай службы


Радыё Свабода, Гомель Сёньня ў судзе Савецкага раёну Гомеля разглядаўся пазоў эканаміста Ўладзімера Бутраменкі да камунальна-жыльлёвага прадпрыемства “Савецкае”. Грамадзянін праз суд спрабуе спагнаць з прадпрыемства 100 мільёнаў рублёў маральнай страты за неаказаныя яму камунальныя паслугі й незаконнае абагачэньне за кошт гараджан.

У судзе спадар Бутраменка распавёў, што ў доме №110 на вуліцы Багдана Хмяльніцкага, дзе ён жыве, тэмпэратура гарачай вады не адпавядае нормам, дрэнна абслугоўваецца ацяпляльная сыстэма. У выніку жыхары дому плацяць штомесяцова на 15-20 тысяч рублёў болей за іншых гараджан.

Чарговы рамонт дому таксама не ажыцьцяўляецца, хаця й відочна насьпела патрэба: працякае дах, не ўпарадкавана дваровая тэрыторыя. А за вываз сьмецьця жыльцы наагул плацяць двойчы.

На знак пратэсту за неаказаныя камунальнікамі паслугі Ўладзімер Бутраменка не аплачваў квіткоў на тэхнічны рамонт дому. ЖЭУ-11 стала зьмяшчаць ягонае прозьвішча ў сьпісах злосных неплацельшчыкаў і праз суд спаганяць плату.

Прадстаўнікі камунальнай службы большасьць выстаўленых да іх прэтэнзій адхіляюць.

Чакаецца, што вырак паводле пазову спадара Бутраменкі да камунальнікаў судзьдзя Армушэвіч абвесьціць 21 жніўня.
XS
SM
MD
LG