Лінкі ўнівэрсальнага доступу

“Зь вялікім задавальненьнем назіраю за гэтай палітычнай мэлядрамай"


Іна Студзінская, Менск Аляксандар Лукашэнка заявіў учора, што «Расея хоча прыватызаваць ня толькі асобныя прадпрыемствы Беларусі, нават бясплатна іх прыхапіць. Яны хацелі б прыватызаваць усю краіну». Як да гэтага выказваньня кіраўніка краіны паставіліся менчукі?

Спадар: “Нечаканы ўчынак Расеі, калі яны ўдвая ўзьвінцілі кошты за газ, незразумелы. Гэта памылка Пуціна. Таму я цалкам падтрымліваю Лукашэнку”.

Дзяўчына: “Я лічу, што сапраўды Расея зараз пачынае вялікую колькасьць нашых прадпрыемстваў папросту скупляць. І за гэтым трэба абавязкова сачыць. З гэтым я згодная. Але з Расеяй рваць адносіны нельга, таму што ў нас няма ніякіх прыродных рэсурсаў. Нават калі мы хочам незалежнасьці ад Расеі, мы ня зможам яе атрымаць”.

Дзядок: “Лукашэнка не аддасьць нічога. Ён знойдзе ў іншым месцы газ”.

Спадар: “Я за тое, каб не аддаваць Беларусь”.

Спадарыня: “Я зь вялікім задавальненьнем назіраю за гэтай палітычнай мэлядрамай. Падчас мінулага скандалу была фраза: “Нашы адносіны атручаны газам». А цяпер ён кажа: «Я ў Крэмль не паеду, на калені ня стану». Любата! Гэта папросту нейкая «Санта-Барбара».

Юнак: «Беларусь, па-мойму, павінна быць з Эўропай, а не з Расеяй. З Расеяй трэба быць прасьцей: яна да нас добра – мы да яе з дабром, яна да нас дрэнна – трэба адказваць тым жа».

Спадар: «А мне ўсё адно».

Спадарыня: «Я думаю, цяжка нам будзе без дапамогі Расеі».

Спадар: «Адносіны – гэта справа часовая. Сёньня адна ўлада, заўтра – іншая будзе ў Расеі. Гэта заўсёды хістаецца, як арэлі».

Карэспандэнтка: «Але без Расеі Беларусь пражыве?»

Спадар: «Пражывем! Толькі трэба крыху мазгамі кеміць і працаваць».

Юнак: «Трэба бало адразу палітыку весьці іншую, не шукаць ворагаў – будзь тое Польшча альбо іншыя краіны. Папросту ён сам паставіў краіну ў такое залежнае становішча ад Расеі».

Спадар: «Я лічу, што можна абысьціся без Расеі, калі знайсьці сабе іншых сяброў – на Захад павярнуцца».

Карэспандэнтка: «Але без Расеі Беларусь выжыве?»

Спадар: «Цяжка будзе, а ўсё ж выжыве».

Карэспандэнтка: «Аляксандар Лукашэнка выказаўся ўчора, што Расея хоча прыватызаваць ня толькі прамысловасьць Беларусі, але і ўсю краіну. Як вы да гэтага ставіцеся?»

Спадар: «Напэўна, ён правы. Яму відней. Там ёсьць сілы алігархічныя, якія хочуць даўно тут усё прыватызаваць, прыбраць».

Спадар: «Рэзкавата ён выказаўся. Але без Расеі мы ня выжывем».

Дзядок: «Правільна Лукашэнка сказаў: самі заплацім. Мо, трэба аглоблі павярнуць на Захад?»

Спадар: «Я лічу, што Лукашэнка крыху пакрыўджаны, таму й выказаўся крыху нетактоўна. Наколькі я ведаю, прыватызацыя Беларусі пакуль не прадугледжана Расеяй. Яго папросту крыўда змусіла так сказаць».
XS
SM
MD
LG