Лінкі ўнівэрсальнага доступу

logo-print

<B>Моладзевых актывістаў затрымліваюць і караюць арыштамі</B>


Любоў Лунёва, Менск У раённых судах Менску пакаралі арыштамі больш за дзясятак затрыманых учора актывістаў моладзевага руху. Большасьць з пакараных — сябры незарэгістраванай арганізацыі “Малады фронт”. Міліцыянты затрымліваюць юнакоў і дзяўчат каля пад’ездаў іх дамоў, на вуліцах і ў падземных пераходах. Каго абвінавачваюць у распаўсюджваньні ўлётак, каго — у дробным хуліганстве.

У судзе Фрунзенскага раёну Менску сабраліся паплечнікі й сваякі Паўла Севярынца і Аляксея Шэіна, а таксама прадстаўнікі АБСЭ і лідэр Аб’яднанай грамадзянскай партыі Анатоль Лябедзька.

Спэцназаўцы доўга не пускалі людзей у судовую залю, куды прывялі Паўла Севярынца. Прысутным давялося зьвяртацца да старшыні суду.

Павал Севярынец на судзе расказаў, што яго разам з Аляксеем Шэіным затрымалі ў падземным пераходзе двое міліцыянтаў у цывільным.

Яны прадставіліся спэцыялістамі з аддзелу кватэрных крадзяжоў і папрасілі паказаць ім зьмесьціва заплечнікаў. Там былі запрашэньні прыйсьці на плошчу Незалежнасьці, каб сустрэцца з дэпутатамі Вярхоўнага Савету, якія прымалі Дэклярацыю аб сувэрэнітэце.

У міліцыі на Шэіна й Севярынца склалі пратаколы за распаўсюд улётак з заклікам удзельнічаць у несанкцыянаваным мерапрыемстве. Нягледзячы на супярэчлівыя паказаньні міліцыянатў-сьведак і заявы Паўла, што яны хлусяць, судзьдзя ў пастанове ўказала, што давярае менавіта міліцыянтам. Судзьдзя абрала максымальны тэрмін пакараньня — 15 сутак арышту.

Павал Севярынец у судовай залі пракамэнтаваў гэтую сытуацыю “Свабодзе”:

“Cуд, як заўсёды, хуткі і няправы. Хутчэй за ўсё, гэта зроблена, каб сарваць нашу сустрэчу з эўрапейскімі амбасадарамі, дзе гаворка павінна была ісьці пра кампанію ў абарону свабоды сумленьня і пра беларускую хрысьціянскую дэмакратыю, а таксама пра перасьлед маладафронтаўцаў.

Арышты і маладафронтаўцаў, і нас з Аляксеем Шэіным ёсьць пацьверджаньнем таго, што ўлады баяцца адзначэньня Дня дзяржаўнай незалежнасьці 27 ліпеня”.

Амаль адначасова судзілі Аляксея Шэіна. Яго таксама арыштавалі на 15 сутак.

У судзе Цэнтральнага раёну Менску на 10 сутак арыштавалі Валянціна Сакалоўскага. Ягоная маці прынесла ў суд даведку пра тое, што яе сын мае цяжкае хранічнае захворваньне, але гэта не паўплывала на судзьдзю.

Гаворыць Ірына Сакалоўская:

“Хвароба, якая ўказаная ў даведцы, ніяк ня лечыцца, і гэты стан здароўя па жыцьці. Але судзьдзі гэта было ўсё роўна. Усё падман і хлусьня... Я абураная. Ніякага правасудзьдзя няма”.

Аляксандра Чарнышова арыштавалі на 15 сутак. Хлопец прыехаў днямі з Польшчы на вакацыі да бацькоў. Учора ўвечары яго выклікалі ў міліцыю. Там яго чакаў супрацоўнік КДБ, які павёў Аляксандра на размову ў КДБ Цэнтральнага раёну. Сьледчы цікавіўся праграмай Каліноўскага.

Калі Аляксандар вяртаўся, каля пад’езду яго спынілі міліцыянты, пасадзілі ў машыну і адвезьлі ў міліцыю. Там яго абвінавацілі ў нецэнзурнай лаянцы.

Юры Вольфсан скончыў трэці курс маскоўскага ўнівэрсытэту Дружбы народаў. Ён прыехаў у Менск з бабуляй па справах.

Гаворыць Юры Вольфсан:

“Затрымалі за расклейку налепак: “Скажы Лукашэнку — не!”. Тут ёсьць два аспэкты. Першы, той, які ідзе таемна, зьвязаны з КДБ, і другі — адкрыты, які ідзе ў суд”.

Чатыры гады таму ў Беларусі зьнік бацька Юрыя Вольфсана, які ўзначальваў фірму “Белфорд”. Юрыя затрымалі ўчора менавіта на тым месцы, дзе невядомыя скралі ягонага бацьку. Ён прызнаў у судзе, што быў у шоку і ўжыў моцныя выразы. Юр’я арыштавалі на 7 сутак.

У судзе Цэнтральнага раёну судзяць Аляксея Бондара. У судзе Савецкага раёну Менску знаходзяцца двое дзяўчат, якіх затрымалі з налепкамі. А ў міліцыі Партызанскага раёну знаходзяцца Аляксей Шыдлоўскі й Павал Бараноўскі. Калі суд скончыць працу, то ўсіх затрыманых адвязуць у турму на вуліцу Акрэсьціна, а заўтра прывязуць у суд.

Менск, 24.07.2007. Суд над маладзёвымі актывістамі. У будынку суду Цэнтральнага раёну У будынку суду Цэнтральнага раёну

Менск, 24.07.2007. Суд над маладзёвымі актывістамі. Сьведкі Сьведкі

Менск, 24.07.2007. Суд над маладзёвымі актывістамі. Аляксандар Чарнышоў Аляксандар Чарнышоў

Менск, 24.07.2007. Суд над маладзёвымі актывістамі. Юры Вольфсан Юры Вольфсан
XS
SM
MD
LG