Лінкі ўнівэрсальнага доступу

Гарадзенцы лічаць, што Беларусі ніхто не пагражае


Сяргей Астраўцоў, Горадня Хто пагражае Беларусі? На гэтае пытаньне адказвалі гарадзенцы, зь якімі размаўляў наш карэспандэнт.



Малады спадар: “Каму мы патрэбныя, яшчэ браць пад сябе гэтае жабрацтва? Гэта ідэалёгія такая ў дзяржаве, што самі сабе прыдумляюць пагрозы, праблемы...”

Маладзён: “Думаю, што няма ніякіх пагрозаў, я ня бачу ніякіх ворагаў”.

Малады спадар: “Думаю, што ніякай варожасьці з боку іншых краінаў няма – няма ніякай пагрозы”.

Маладзён: “Палітыка нашай беларускай дзяржавы не задавальняе суседнія краіны, мы ж аб’ядноўваемся нібыта не з Захадам, а з Расеяй”.

Ягоны сябра: “А Расея нам пагражае толькі тым, што хоча ператварыць Беларусь не ў сувэрэнную дзяржаву, а ў сваю губэрню. Карацей, мы страцім дзяржаўнасьць і ператворымся ў звычайную вобласьць”.

Спадар: “Думаю, што ніхто ня хоча нападаць на Беларусь, сёньня гэта нікому ня трэба. Я сумняваюся, што сёньня хтосьці пры заходнім якасным жыцьці палез бы на кагосьці — не, ніколі!”

Малады спадар: “Не, хто нам будзе пагражаць? Мы ўсе нармальныя людзі, ставімся адзін да аднаго нармальна, усе добрыя суседзі”.

Дзяўчына: “Я думаю, што Беларусі ніхто не пагражае, але калі глядзець тэлевізар, то такое пачуць можна, але мы яго апошнім часам не глядзім”.

Яе сяброўка: “Ворагі Беларусі ёсьць у Беларусі — кожны, атрымліваецца, вораг сам сабе, і ня трэба шукаць за мяжой”.

Хлопец: “Няма ў нас ворагаў, толькі ўсе ўнутры, пачаць трэба з высокіх чыноў... А так: хто нам можа пагражаць? Суседнія краіны? Не!”

Малады спадар: “Я думаю, што ў нас усё нармальна, ніхто нам не пагражае”.

Спадар: “Думаю, ніхто нам не пагражае. Паводле Канстытуцыі, Беларусь праводзіць нэўтральную палітыку, не далучаецца ні да якіх блёкаў, так што думаю, няма ў нас такіх ворагаў, якіх, можа, нам малююць або пра якіх гавораць. Я ўпэўнены, што іх няма”.

Малады спадар: “Я лічу, што наяўных ворагаў у Беларусі няма. Я ня бачу краінаў, якія б хацелі парушыць наш сувэрэнітэт”.

Малады спадар: “Ня думаю, што хтосьці хоча на нас напасьці, у нас толькі запалохваньне існуе. Толькі незразумела — навошта?”

Спадар: “Мы мірныя людзі, і нам баяцца няма чаго”.

Маладзён: “Думаю, што наўрад: пагражаць Беларусі — гэта нікому не патрэбна, хіба што толькі Расеі”.
XS
SM
MD
LG