Лінкі ўнівэрсальнага доступу

Робэрт Гэйтс: ЗША не адмовяцца ад пабудовы радара ў Эўропе


Юрась Бушлякоў, Прага Міністар абароны ЗША Робэрт Гэйтс заявіў, што Злучаныя Штаты ня зьменяць сваіх плянаў адносна пабудовы ў Чэхіі і Польшчы элемэнтаў сыстэмы проціракетнай абароны. Гэйтс зрабіў заяву падчас нарады міністраў замежных справаў НАТО, якая завяршылася сёньня ў Брусэлі.

Амэрыканскі міністар даў зразумець, што нядаўняя прапанова Расеі аб супольным выкарыстаньні радыёлякацыйнай станцыі ў Азэрбайджане не паўплывае на намеры Злучаных Штатаў. Паводле Робэрта Гэйтса, Вашынгтон разглядае расейскую прапанову толькі як магчымы дадатак да сваіх плянаў пабудовы ў Цэнтральнай Эўропе сыстэмы проціракетнай абароны.

“Я быў вельмі шчыры, калі казаў, што мы разглядаем азэрбайджанскі радар як дадатковую магчымасьць і што мы маем намер дзейнічаць далей для пабудовы радара ў Чэскай Рэспубліцы”, – сказаў у Брусэлі міністар абароны ЗША.

Расея тым часам працягвае выступаць супраць амэрыканскіх плянаў – нягледзячы на неаднаразовыя заявы Злучаных Штатаў аб тым, што разгортваньне сыстэмы проціракетнай абароны ў Эўропе накіравана ня супраць Расеі, а супраць Ірану і Паўночнай Карэі.

Выступаючы ў Брусэлі, прадстаўнік НАТО Джэймз Апатурай заявіў пра жаданьне Паўночнаатлянтычнага блёку, каб пляны ЗША ў Эўропе былі максымальна празрыстыя для Расеі. Паводле Апатурая, усе міністры замежных справаў краінаў НАТО зацікаўленыя ў тым, каб разьвеяць заклапочанасьць Масквы адносна амэрыканскай сыстэмы проціракетнай абароны.
XS
SM
MD
LG